ആറന്മുള : ആറന്മുള പാർത്ഥസാരഥിക്ക് തിരുവോണ വിഭവങ്ങളുമായി ഉത്രാടനാളിലെ സന്ധ്യയിൽ കാട്ടൂരിൽനിന്ന് പുറപ്പെടുന്ന തിരുവോണത്തോണിക്കുള്ള വരവേൽപ്പ് കോവിഡ് മാനദണ്ഡം പാലിച്ച് നടത്താൻ ദേവസ്വം ബോർഡിനോട് ആവശ്യപ്പെടുമെന്ന് ആറന്മുള പള്ളിയോട സേവാസംഘം.
കാട്ടൂർ തിരുവോണത്തോണി കമ്മിറ്റിയുമായും മങ്ങാട്ട് ഭട്ടതിരിയുമായും സേവാസംഘം ചർച്ച നടത്തി. തിരുവോണത്തോണിയിൽ ആചാരപ്രകാരം കാട്ടൂരിലെ 18 നായർ തറവാട്ടിലെ പ്രതിനിധികൾ ഭട്ടതിരിക്കൊപ്പം ആറന്മുളയ്ക്ക് എത്തുന്നതാണ് ആചാരം. കഴിഞ്ഞ വർഷംവരെ തിരുവോണത്തോണിയെ നയിച്ചിരുന്ന മങ്ങാട്ട് നാരായണ ഭട്ടതിരി മരണപ്പെട്ടതിനെ തുടർന്ന് നിലവിൽ ഇല്ലത്തെ മൂപ്പുമുറക്കാരണവരായ ബാബു ഭട്ടതിരി നിയോഗത്തിനായി ഒരുങ്ങിക്കഴിഞ്ഞതായും ഭാരവാഹികൾ പറഞ്ഞു.
കോവിഡ് മാനദണ്ഡം പാലിച്ച് തോണിയിൽ കയറേണ്ടവരുടെ എണ്ണം പരിമിതപ്പെടുത്തി തോണിവരവ് നടത്തണമെന്ന് ദേവസ്വം ബോർഡിനോട് ആവശ്യപ്പെടാനും സേവാസംഘം തീരുമാനിച്ചതായി ആറന്മുള പള്ളിയോട സേവാസംഘം പ്രസിഡന്റ് ബി.കൃഷ്ണകുമാർ കൃഷ്ണവേണി, സെക്രട്ടറി പി.ആർ.രാധാകൃഷ്ണൻ എന്നിവർ വ്യക്തമാക്കി.