പത്തനംതിട്ട : തിരുവാറന്മുളയപ്പനുള്ള ഓണവിഭവങ്ങളുമായി തിരുവോണ തോണി കാട്ടൂര് മഹാവിഷ്ണു ക്ഷേത്രത്തില് നിന്ന് പുറപ്പെട്ടു. തിരുവോണ ദിവസമായ നാളെ പുലര്ച്ചെ തോണി ആറന്മുള ക്ഷേത്രത്തിലെത്തും. കൊറോണയുടെ പശ്ചാത്തലത്തില് മൂന്നു പള്ളിയോടങ്ങള് മാത്രമാണ് തിരുവോണത്തോണിക്ക് അകമ്പടി സേവിക്കുന്നത്.
ആഘോഷങ്ങളുടെ പെരുമായില്ലാതെയാണ് ഈ വട്ടം തിരുവോണ തോണി പുറപ്പെട്ടത്. കാട്ടൂര് മഹാവിഷ്ണു ക്ഷേത്രത്തില് നിന്ന് ദീപാരാധനയ്ക്ക് ശേഷം മേല്ശാന്തി പകര്ന്ന് നല്കിയ ദീപം മങ്ങാട്ടില്ലത്ത് രവീന്ദ്രബാബു ഭട്ടതിരി ആറന്മുളയിലെത്തിക്കും. ഈ ദീപമാണ് അടുത്ത ഒരു കൊല്ലം ആറന്മുളയിലെ കെടാവിളക്കില് തെളിയുക. കാട്ടൂര് ക്ഷേത്രത്തിലെ ഉരലില് കുത്തിയെടുത്ത നെല്ലിന്റെ അരിയുള്പ്പെടെയുള്ള വിഭവങ്ങള് തോണിയിലുണ്ട്. വിഭവങ്ങളെല്ലാം മങ്ങാട്ട് ഭട്ടതിരി ആറന്മുളയപ്പന് സമര്പ്പിക്കും. ഈ വിഭവങ്ങള് ചേര്ത്താണ് നാളെ ആറന്മുളയില് തിരുവോണ സദ്യ.
കൊറോണ നിയന്ത്രണങ്ങളുടെ ഭാഗമായി ഈ വര്ഷം കോഴഞ്ചേരി, കീഴ്വന്മഴി, മാരാമണ് എന്നീ മൂന്ന് പള്ളിയോടങ്ങള്ക്ക് മാത്രമാണ് തിരുവോണത്തോണിയെ അകമ്പടി സേവിക്കാന് അനുമതി ലഭിച്ചത്. നാളെ പുലര്ച്ചെയാണ് തിരുവോണ തോണി ആറന്മുള മധുകടവിലെത്തുക. ആറന്മുളയിലെത്തുന്ന തിരുവോണത്തോണിക്ക് ആചാരപരമായ സ്വീകരണം നല്കും. തിരുവോണസദ്യക്ക് ശേഷം ഭഗവാന് പണക്കിഴി സമര്പ്പിച്ച് ഭട്ടതിരി മങ്ങാട്ടേക്ക് മടങ്ങുന്നതോടെ തിരുവോണ നാളിലെ ചടങ്ങുകള്ക്ക് സമാപനമാകും.