തൃശൂര് : ടിപി ചന്ദ്രശേഖരന് വധക്കേസിലെ പ്രതി കൊടി സുനിയുടെ സെല്ലില്നിന്ന് മൊബൈല് ഫോണും കഞ്ചാവും പിടികൂടി. ടിപി വധക്കേസില് വിയ്യൂര് സെന്ട്രല് ജയിലില് തടവുശിക്ഷ അനുഭവിക്കുന്ന മുഖ്യപ്രതിയാണ് കൊടി സുനി. വെള്ളിയാഴ്ച പുലര്ച്ചെ ഹെഡ്സെറ്റ് ഉപയോഗിച്ച് ഫോണ് വിളിക്കുന്നതിനിടെയാണ് പിടികൂടിയത്. ഇതോടൊപ്പം കത്രിക, മൊബൈല് ചാര്ജര് എന്നിവയും കണ്ടെടുത്തു.
സി ബ്ലോക്കിലെ സെല്ലില് ഒറ്റയ്ക്ക് കഴിയുന്ന കൊടി സുനിയുടെ കയ്യില് ഫോണ് എവിടെനിന്ന് കിട്ടിയതാണെന്നത് സംബന്ധിച്ച് ജയില് അധികൃതര് അന്വേഷണം ആരംഭിച്ചു. ഇത് സംബന്ധിച്ച് വിയ്യൂര് പോലീസും അന്വേഷണം ആരംഭിച്ചിട്ടുണ്ട്. കോവിഡ് കാലമായതിനാല് തടവുകാരെ പുറത്തേക്ക് കൊണ്ടുപോകാത്തതിനാല് ജയില് അധികൃതരുടെ പങ്ക് സംബന്ധിച്ചും അന്വേഷണം നടക്കും. കൊടി സുനി ഉള്പ്പെടെയുള്ള ടി.പി കേസിലെ മറ്റു പ്രതികളും ജയിലില് ഫോണ് ഉപയോഗിച്ചത് നേരത്തേയും അധികൃതര് കണ്ടെത്തിയിരുന്നു.
