കോട്ടയം : ആല്‍ബത്തിന് ആവശ്യമായ ജോലികള്‍ ചെയ്തുകൊടുക്കണമെന്ന് ആവശ്യപ്പെട്ടുകൊണ്ട് ആരോ ഫോണിലേക്ക് വിളിച്ചിരുന്നതായും താല്‍പര്യമില്ലെന്ന് അറിയിച്ചതോടെ മകളെ തട്ടിക്കൊണ്ടുപോകുമെന്ന് ഭീഷണിപ്പെടുത്തിയതായും വീട്ടമ്മയുടെ പരാതി. കോട്ടയം മേലുകാവ് സ്വദേശിനിയാണ് പരാതിയുമായി പോലീസിനെ സമീപിച്ചത്.
ആല്‍ബത്തിന് ആവശ്യമായ ജോലികള്‍ ചെയ്തുകൊടുക്കണമെന്ന് ആവശ്യപ്പെട്ടുകൊണ്ട് കുട്ടിയുടെ ഫോണിലേക്കാണ് ആദ്യം വിളിച്ചത്. ഇയാള്‍ പിന്നീട് അമ്മയെയും മകളെയും തുടര്‍ച്ചയായി വിളിച്ചിരുന്നു. തുടര്‍ന്ന്, ആല്‍ബത്തിന്റെ ജോലിക്കു താല്‍പര്യമില്ലെന്ന് അറിയിച്ചു. ഇതോടെ മകളെ തട്ടിക്കൊണ്ടുപോകുമെന്നു ഭീഷണിപ്പെടുത്തുകയായിരുന്നുവെന്നും പരാതിക്കാരി പറഞ്ഞു.
ചൈല്‍ഡ് ലൈനിലും പരാതി നല്‍കിയിട്ടുണ്ട്. ആറന്മുള സ്വദേശിയുടെ മോഷ്ടിച്ച സിം കാര്‍ഡില്‍ നിന്നാണു വിളിക്കുന്നതെന്നും ഇതേ നമ്പറില്‍ നിന്നു സമാനമായ പരാതി പല സ്റ്റേഷനിലും ലഭിച്ചിട്ടുണ്ടെന്നും അന്വേഷണത്തില്‍ വ്യക്തമായതായി മേലുകാവ് പോലീസ് പറഞ്ഞു.
