റിയാദ്: വ്യാജ തൊഴിൽ വീസയുമായി സൗദിയിലെത്തിയ മൂന്ന് തിരുവനന്തപുരം സ്വദേശികളെ രാജ്യത്ത് പ്രവേശിപ്പിക്കാതെ അധികൃതർ തിരിച്ചയച്ചു. റിയാദ് കിങ് ഖാലിദ് രാജ്യാന്തര വിമാനത്താവളത്തിലെത്തിയ ഇവരെ പരിശോധനയിൽ വീസ വ്യാജമാണെന്ന് കണ്ടെത്തിയതിനെ തുടർന്നാണ് നടപടി. നാലു ദിവസം മുൻപാണ് മൂവരും റിയാദിലെത്തിയത്. വീസ സംബന്ധമായ പരിശോധനകൾ പൂർത്തിയാകാത്തതിനാൽ ഇവർ വിമാനത്താവളത്തിൽ തന്നെ തുടരുകയായിരുന്നു. നടപടിക്രമങ്ങൾ പൂർത്തിയാക്കിയ ശേഷം തൊട്ടടുത്ത ദിവസം കോഴിക്കോട്ടേക്കുള്ള വിമാനത്തിൽ ഇവരെ തിരിച്ചയച്ചു.
മറ്റൊരു വ്യക്തിയുടെ വീസയുടെ പ്രിന്റിൽ പ്രധാന വിവരങ്ങൾ തിരുത്തിയാണ് വ്യാജ വീസ തയ്യാറാക്കിയതെന്നാണ് കണ്ടെത്തൽ. വീസ നമ്പർ, തീയതി, പേര്, പാസ്‌പോർട്ട് നമ്പർ, റഫറൻസ് നമ്പർ, തൊഴിൽ തുടങ്ങിയ വിവരങ്ങളിലാണ് മാറ്റം വരുത്തിയിരുന്നത്. വീസ യഥാർഥമാണെന്ന് വിശ്വസിപ്പിച്ചാണ് ഏജന്റുമാർ ഇവരെ സൗദിയിലേക്ക് അയച്ചതെന്നാണ് വിവരം. ഒരു വീസയ്ക്ക് ഏകദേശം ഒന്നര ലക്ഷം രൂപ വീതം സൗദിയിലെ ഏജന്റ് ഈടാക്കിയതായും റിപ്പോർട്ടുണ്ട്. സംഭവത്തിൽ കൂടുതൽ അന്വേഷണം നടക്കുന്നതായാണ് വിവരം.
