തൃശ്ശൂര് : നിക്ഷേപ സംഖ്യ കാലാവധി കഴിഞ്ഞ് തിരികെ നൽകാതിരുന്നതിനെത്തുടര്ന്ന് ഫയൽ ചെയ്ത ഹർജിയിൽ തൃശൂർ വെസ്റ്റ് ഫോർട്ടിലുള്ള ബ്ലൂ ഹെഡ്ജ് ഫിനാൻസ് ആന്റ് ഗോൾഡ് ലോൺ മാനേജിങ്ങ് ഡയറക്ടർ 1,10,000 രൂപ നൽകുവാൻ തൃശൂർ ഉപഭോക്തൃ കോടതി വിധി. തൃശൂർ മാങ്ങാട്ടുകര സ്വദേശിനി വസന്തലക്ഷ്മി.ജി. ഫയൽ ചെയ്ത ഹർജിയിലാണ് ഈ ഉത്തരവ്. 1,00,000 രൂപയാണ് വസന്തലക്ഷ്മി എതിർകക്ഷിയുടെ സ്ഥാപനത്തിൽ നിക്ഷേപിച്ചത്. കാലാവധി കഴിഞ്ഞ് നിക്ഷേപ സംഖ്യ തിരികെ ആവശ്യപ്പെട്ടുവെങ്കിലും നല്കിയില്ല. തുടർന്ന് തൃശൂർ ഉപഭോക്തൃ കോടതിയില് ഹര്ജി ഫയല് ചെയ്യുകയായിരുന്നു.
നിക്ഷേപ സംഖ്യ തിരികെ നൽകാതിരിക്കുന്നത് അനുചിത ഇടപാടും സേവനത്തിലെ വീഴ്ചയുമാണെന്ന് കോടതി വിലയിരുത്തി. തെളിവുകൾ പരിഗണിച്ച പ്രസിഡണ്ട് സി.ടി.സാബു, മെമ്പർമാരായ ശ്രീജ.എസ്, ആർ.റാം മോഹൻ എന്നിവരടങ്ങിയ തൃശൂർ ഉപഭോക്തൃകോടതി നിക്ഷേപ സംഖ്യ 1,00,000 രൂപയും 9% പലിശയും നഷ്ടപരിഹാരമായി 10,000 രൂപയും നൽകുവാൻ വിധി പുറപ്പെടുവിക്കുകയായിരുന്നു. ഹർജിക്കാരന് വേണ്ടി അഡ്വ.ഏ.ഡി.ബെന്നി ഹാജരായി.
