തിരുവനന്തപുരം: സെന്സസ് പ്രക്രിയയിലൂടെ ദേശീയ ജനസംഖ്യാ രജിസ്റ്റര് (എന്പിആര്) തയ്യാറാക്കുന്നതിനുള്ള അജണ്ടകള് കേന്ദ്ര സര്ക്കാര് ഒളിച്ചുകടത്തുകയാണെന്ന് പ്രതിപക്ഷനേതാവ് പിണറായി വിജയന്. വരാനിരിക്കുന്ന സെന്സസ് ചോദ്യാവലിയില് മാതാപിതാക്കളുടെ ജനനസ്ഥലവും മതവും ഉള്പ്പെടെയുള്ള വിവരങ്ങള് ഉള്പ്പെടുത്തിയതായി വാര്ത്തകള് പുറത്തുവന്നിട്ടുണ്ട്. രാജ്യത്തെ ജനങ്ങളെ ഭിന്നിപ്പിക്കാന് ലക്ഷ്യമിട്ടുള്ള ഈ നീക്കം അത്യന്തം അപലപനീയമാണെന്നും പിണറായി വിജയന് പറഞ്ഞു.
‘സെന്സസും എന്പിആറും രണ്ടാണെങ്കിലും, സെന്സസിനൊപ്പം എന്പിആര് കൂടി ഉള്പ്പെടുത്താനാണ് കേന്ദ്രശ്രമം. എന്പിആറിലെ വിവരങ്ങള് അരിച്ചെടുത്താണ് എന്ആര്സി ലിസ്റ്റ് തയ്യാറാക്കുന്നതെന്നും എന്പിആര് എന്നത് എന്ആര്സിയുടെ ആദ്യപടിയാണെന്നും 2018-19 ലെ ആഭ്യന്തരവകുപ്പിന്റെ റിപ്പോര്ട്ടില് തന്നെ വ്യക്തമാക്കുന്നുണ്ട്. മാതാപിതാക്കളുടെ ജനനസ്ഥലം, മതം തുടങ്ങിയ ചോദ്യങ്ങള് സെന്സസില് ഉള്പ്പെടുത്തുന്നത് എന്ത് ഉദ്ദേശിച്ചാണ് എന്നത് പകല് പോലെ വ്യക്തമാണ്. പൗരത്വത്തെ മതവുമായി ബന്ധിപ്പിക്കുന്ന ഒരു നയവും അംഗീകരിക്കാന് കഴിയില്ല. ജനങ്ങളെ ഭിന്നിപ്പിക്കുന്ന ഇത്തരം ദുരൂഹമായ ചോദ്യങ്ങള് സെന്സസില് നിന്ന് അടിയന്തരമായി ഒഴിവാക്കാന് കേന്ദ്ര സര്ക്കാര് തയ്യാറാകണം’ പിണറായി വിജയന് ആവശ്യപ്പെട്ടു.
