വയനാട് : കൊളവള്ളിയില് ജനവാസ കേന്ദ്രത്തിലിറങ്ങിയ കടുവയെ മയക്കുവെടി വെച്ചു. മൂന്നരയോടെയാണ് സംഭവം. മയക്കുവെടി വെയ്ക്കുന്നതിനിടെ പുല്പ്പള്ളി ഫോറസ്റ്റ് ഓഫീസിലെ വാച്ചര് വിജേഷിന് പരിക്കേറ്റു. ഡ്രോണ് നിരീക്ഷണത്തിലാണ് കടുവയെ കണ്ടെത്തിയത്. കൈക്കാണ് പരിക്കേറ്റത്. കടുവയെ മയക്കുവെടി വെച്ചതിന് പിന്നാലെ നിരീക്ഷിക്കുന്നതിനിടെയാണ് ആക്രമണമുണ്ടായത്.
കഴിഞ്ഞ ദിവസം റേഞ്ച് ഓഫിസറെ ആക്രമിച്ച ശേഷം മറഞ്ഞ കടുവ കബനി വിട്ട് കര്ണാടകയിലേക്ക് പോയിട്ടില്ലെന്ന് ഇന്നലെത്തന്നെ വനംവകുപ്പ് ഉറപ്പിച്ചിരുന്നു. ഇന്ന് പുലര്ച്ചെ കൃഷിയിടത്ത് കണ്ട കാല്പ്പാടുകള് കടുവയുടേതെന്നും സ്ഥിരീകരിച്ചിരുന്നു. ഇതിന് പിന്നാലെ ഡ്രോണ് വഴിയുള്ള ആകാശ നിരീക്ഷണവും ഏഴ് ഗ്രൂപ്പുകളായി തിരിഞ്ഞ് വനപാലകര് നടത്തുകയും ചെയ്ത തിരച്ചിലില് കടുവയെ കണ്ടെത്തുകയായിരുന്നു. തുടര്ന്നാണ് മയക്കുവെടിവച്ചത്. കടുവ പൂര്ണമായും മയങ്ങിയിട്ടില്ലെന്നാണ് സൂചന. തുടര്നടപടികള് പുരോഗമിക്കുകയാണ്.
