റാന്നി : കടുവ ഇറങ്ങിയെന്ന വ്യാജ വീഡിയോയിൽ പോലീസ് അന്വേഷണം ആരംഭിച്ചു. കഴിഞ്ഞ ദിവസം മുതലാണ് കടുവ തേക്കിൻ കൂപ്പിലൂടെ നടന്നുപോകുന്ന വിഡിയോയ്ക്ക് വിവിധ വന പ്രദേശങ്ങളുടെ പേര് ചേർത്ത് കടുവ ഇറങ്ങിയെന്ന തലക്കെട്ടോടെ വ്യാജ പ്രചരണം ശക്തമായത്. ശബരിമല വനമേഖലയിലെ തുലാപ്പള്ളി ഇലവുങ്കല്‍ മേഖലയില്‍ കണ്ടതാണെന്നും വനംവകുപ്പ് ഉദ്യോഗസ്ഥര്‍ പകര്‍ത്തിയതാണെന്നുമാണ് ഒരടികുറുപ്പ്. കഴിഞ്ഞ ദിവസം ചെന്നാപ്പാറ മേഖലയിൽ പുലിയുടെ ആക്രമണ കഥ വ്യാപകമായതിനിടയിലാണ് ജനങ്ങളെ ഭീതിയിലാഴ്ത്തി വ്യാജ വീഡിയോ പ്രചരിക്കുന്നത്.
വണ്ടൻ പതാൽ തേക്കിൻ കൂപ്പിൽ കടുവ എന്ന തലവാചകമടക്കവും സമൂഹമാധ്യമങ്ങളിൽ വീഡിയോ പ്രചരിക്കുന്നുണ്ട്. എന്നാല്‍ ഈ വിഡിയോ വർഷങ്ങൾക്ക് മുൻപ് ഉള്ളതാണ്. ചെന്നാപ്പാറയിൽ പുലി ഭീതി വിട്ടൊഴിയും മുൻപേ അടുത്ത ഭയം ജനങ്ങളില്‍ സൃഷ്ടിച്ചിരിക്കുകയാണ് ഇതുവഴി. തെറ്റായ വീഡിയോ പ്രചരിക്കുന്നത് സോഷ്യൽ മീഡിയയിൽ വ്യാപകമായതോടെ പോലീസ് രഹസ്യന്വേഷണ വിഭാഗവും അന്വേഷണം ആരംഭിച്ചിട്ടുണ്ട്.
