വാഷിങ്ടണ് : ടിക് ടോക്ക് സേവനങ്ങള് അമേരിക്കയില് നിരോധിച്ചു കൊണ്ടുള്ള ഡൊണാള്ഡ് ട്രംപിന്റെ ഉത്തരവ് പ്രാബല്യത്തില് വരാന് മണിക്കൂറുകള് മാത്രം ബാക്കി നില്ക്കേ സര്ക്കാരിന്റെ ഉത്തരവിന് സ്റ്റേ. വാഷിങ്ടണിലെ യു.എസ്. ജില്ലാ കോടതി ജഡ്ജി കാള് നിക്കോള്സാണ് താല്ക്കാലിക സ്റ്റേ പുറപ്പെടുവിച്ചത്.
തിങ്കളാഴ്ച അര്ധരാത്രി മുതലാണ് ടിക് ടോക് ആപ്പ് ഡൗണ്ലോഡ് ചെയ്യുന്നതിന് നിരോധനം ഏര്പ്പെടുത്തിയത്. എന്നാല് നവംബര് 12 വരെ ആപ്ലിക്കേഷന് ഉപയോഗിക്കാനുള്ള അനുമതിയും ട്രംപ് ഭരണകൂടം നല്കിയിരുന്നു. ഈ നടപടിയിലുള്ള ടിക് ടോക്കിന്റെ ഹര്ജി പരിഗണിച്ചു കൊണ്ടായിരുന്നു ജഡ്ജിയുടെ നടപടി.
ടിക് ടോക്കിന്റെ മാതൃകമ്പനിക്ക് ചൈനീസ് സര്ക്കാരുമായി ബന്ധമുണ്ടെന്നും ഇത് ദേശീയ സുരക്ഷയ്ക്ക് വെല്ലുവിളിയാണെന്നും ചൂണ്ടിക്കാട്ടിയായിരുന്നു ട്രംപ് ഭരണകൂടം ടിക് ടോക്കിനെതിരെ നടപടി എടുത്തത്.