കോന്നി : നിരവധി രോഗികൾ ദിനം പ്രതി എത്തുന്ന കോന്നി താലൂക് ആശുപത്രി ഒ പി ബ്ലോക്കിലെ ശുചിമുറിയുടെ മാലിന്യം കടന്നുപോകുന്ന പൈപ്പ് പൊട്ടി മലിന ജലം ഒഴുകിയിട്ടും തകരാർ പരിഹരിക്കാൻ നടപടിയില്ല. മാസങ്ങൾ കഴിഞ്ഞു ഒ പി ബ്ലോക്കിലെ ശുചിമുറി പൈപ്പ് പൊട്ടിയിട്ട്. എന്നാൽ നാളിതുവരെ അധികൃതർ ഇത് പരിഹരിക്കാനുള്ള നടപടി സ്വീകരിക്കാൻ തയ്യാറായിട്ടില്ല. മലിന ജലത്തിന്റ ദുർഗന്ധം മൂലം രോഗികൾക്കും ജീവനക്കാർക്കും പ്രദേശത്ത് നിൽക്കുവാൻ പോലും കഴിയാത്ത അവസ്ഥയാണ്. ഭിത്തിയിലൂടെ കടന്ന് പോകുന്ന പൈപ്പിൽ ആണ് പൊട്ടൽ ഉള്ളത്.
മലിന ജലം ഭിത്തിയിലൂടെ താഴേക്ക് ഒഴുകി ഇറങ്ങുന്നതും കാണാം. ഒ പി ബ്ലോക്കിലേക്ക് ജനങ്ങൾ കടന്ന് പോകുന്ന വഴിയുടെ തൊട്ടടുത്തയാണ് പൈപ്പ് പൊട്ടി ദുർഗന്ധം വമിക്കുന്നത്. പ്രദേശത്തെ ദുർഗന്ധം മൂലം ജീവനക്കാർ ബ്ലീച്ചിങ് പൗഡർ വിതറിയാണ് ഇപ്പോൾ ദുർഗന്ധം കുറയ്ക്കുന്നത്. വിഷയത്തിൽ അധികൃതർ നടപടി സ്വീകരിക്കാത്തത്തിൽ ജനങ്ങളുടെ പ്രതിഷേധം ശക്തമാണ്.
