ചെറുകോല്: ചെറുകോല് ഗ്രാമപഞ്ചായത്തില് ഉള്പ്പെടുന്ന വാഴക്കുന്നം ജംഗ്ഷന് സമീപം കനാലില് വീണ്ടും കക്കൂസ് മാലിന്യം തള്ളി. പി.എ.പി കനാലിനോട് ചേര്ന്നാണ് മാലിന്യം തള്ളിയത്. മാലിന്യത്തിന്റെ ദുര്ഗന്ധം കാരണം പ്രദേശത്ത് നില്ക്കാന് പോലും സാധിക്കാത്ത അവസ്ഥയാണ്. മഴകൂടി പെയ്തതോടെ കനാല് വെള്ളത്തിലേക്ക് ഒഴുകി ഇറങ്ങുകയാണ് കക്കൂസ് മാലിന്യം. ഇത് മൂലം വെള്ളത്തിന് നിറ വത്യാസവും അനുഭവപ്പെട്ടിട്ടുണ്ട്. കഴിഞ്ഞ പുലര്ച്ചെ മൂന്നുമണിക്ക് ശേഷമാണ് സംഭവം നടന്നതെന്നാണ് പ്രദേശവാസികള് പറയുന്നത്. ഈ സമയത്ത് ഈ ഭാഗത്ത് വൈദ്യുതി ഓഫ് ചെയ്ത ശേഷമാണ് ഇവര് മാലിന്യം തള്ളിയത് എന്നും ജനങ്ങള് പറയുന്നു.
ജനങ്ങളുടെ പരാതിയെ തുടര്ന്ന് സ്ഥലത്തെത്തിയ ആറന്മുള പോലീസ് സമീപത്തെ ബാങ്കിലെ സി.സി.റ്റി.വി ദൃശ്യങ്ങളും ശേഖരിച്ചിട്ടുണ്ട്. സംഭവം ഗ്രാമപഞ്ചായത്ത് അധികൃതരെയും അറിയിച്ചിട്ടുണ്ട്. കഴിഞ്ഞ നാല് മാസങ്ങള്ക്ക് മുന്പും ഇത്തരത്തില് ഇതേ സ്ഥലത്ത് മാലിന്യം തള്ളുകയും നാട്ടുകാര് പോലീസില് പരാതി നല്കുകയും ചെയ്തിരുന്നു. എന്നിട്ടും യാതൊരു നടപടിയും ഉണ്ടായില്ല. വലിയ ഏതോ സ്ഥാപനത്തില് നിന്നുള്ള കക്കൂസ് മാലിന്യമാണ് തള്ളുന്നത് എന്നാണ് നാട്ടുകാരുടെ നിഗമനം. ഈ ഭാഗങ്ങളില് പോലീസ് രാത്രികാല പരിശോധനകള് കര്ശനമാക്കണമെന്നും പ്രദേശവാസികള് ആവശ്യപ്പെടുന്നു.
