കഴിഞ്ഞ ഒരു വർഷത്തിനിടെ രാജ്യത്തെ സ്ഥിര നിക്ഷേപ (FD) പദ്ധതികളുടെ ആദായനിരക്ക് ഗണ്യമായി ഉയർന്നിട്ടുണ്ട്. മുതിർന്ന പൗരന്മാരുടെ നിക്ഷേപത്തിന്, താരതമ്യേന ഉയർന്ന പലിശയാണ് നൽകാറുള്ളത്. വൻകിട വാണിജ്യ ബാങ്കുകളിലെ സ്ഥിര നിക്ഷേപങ്ങളുടെ പലിശ 8% നിരക്കിലാണ് നിൽക്കുന്നതെങ്കിലും സ്മോൾ ഫിനാൻസ് ബാങ്കുകൾ മുതിർന്ന പൗരന്മാരായ നിക്ഷേപങ്ങളിൽ 9% നിരക്കിൽ ആദായം നൽകുന്നുണ്ട്. നിലവിൽ മുതിർന്ന പൗരന്മാർക്ക് 9 ശതമാനത്തിന് മുകളിൽ പലിശ വാഗ്ദാനം ചെയ്യുന്ന 5 ബാങ്കുകളുടെ വിശദാംശമാണ് ചുവടെ നൽകുന്നത്.
യൂണിറ്റി സ്മോൾ ഫിനാൻസ് ബാങ്ക്
പ്രമുഖ ചെറുകിട ബാങ്കിംഗ് സ്ഥാപനങ്ങളിലൊന്നായ യൂണിറ്റി സ്മോൾ ഫിനാൻസ് ബാങ്ക്, ഒന്നിലധികം കാലയളവിലേക്കുള്ള സ്ഥിരനിക്ഷേപങ്ങൾക്ക് 9 ശതമാനത്തിന് മുകളിൽ പലിശ നൽകുന്നുണ്ട്. 181 ദിവസം മുതൽ 201 ദിവസം വരെയുള്ള നിക്ഷേപത്തിന്മേൽ 9.25% നിരക്കിൽ പലിശ നൽകും. 501 ദിവസത്തേക്കുള്ള നിക്ഷേപത്തിനും 9.25% നിരക്കിലാണ് പലിശ ലഭിക്കുന്നത്. 1001 ദിവസത്തേക്കുള്ള നിക്ഷേപത്തിന് 9.5% നിരക്കിലാണ് ആദായം നൽകുക.
ഫിൻകെയർ സ്മോൾ ഫിനാൻസ് ബാങ്ക്
മുതിർന്ന പൗരന്മാരായ നിക്ഷേപകരുടെ 1000 ദിവസത്തെ കാലാവധിയിലേക്കുള്ള സ്ഥിരനിക്ഷേപത്തിന് 9.11% നിരക്കിൽ പലിശ നൽകുമെന്നാണ് ഫിൻകെയർ സ്മോൾ ഫിനാൻസ് ബാങ്കിന്റെ അറിയിപ്പ്.
ജന സ്മോൾ ഫിനാൻസ് ബാങ്ക്
366 ദിവസം മുതൽ 499 ദിവസം വരെയുള്ള നിക്ഷേപത്തിന് 9% നിരക്കിൽ പലിശ നൽകുമെന്ന് ജന സ്മോൾ ഫിനാൻസ് ബാങ്ക് അറിയിച്ചു. 501 ദിവസം മുതൽ 730 ദിവസം വരെയുള്ള നിക്ഷേപത്തിന്മേലും 9% പലിശ നൽകും. 500 ദിവസത്തെ സ്ഥിര നിക്ഷേപത്തിനും 9% നിരക്കിൽ പലിശ വാഗ്ദാനം ചെയ്യുന്നു.
സൂര്യോദയ് സ്മോൾ ഫിനാൻസ് ബാങ്ക്
പ്രമുഖ ചെറുകിട ബാങ്കിംഗ് സ്ഥാപനങ്ങളിലൊന്നായ സൂര്യോദയ് സ്മോൾ ഫിനാൻസ് ബാങ്ക്, 5 വർഷത്തെ കാലാവധിയിലേക്കുള്ള സ്ഥിര നിക്ഷേപത്തിന് 9.6% നിരക്കിൽ പലിശ വാഗ്ദാനം ചെയ്യുന്നുണ്ട്. 999 ദിവസത്തേക്കുള്ള നിക്ഷേപത്തിന് 9% നിരക്കിലും പലിശ നൽകും.
ഇസാഫ് സ്മോൾ ഫിനാൻസ് ബാങ്ക്
കേരളം ആസ്ഥാനമായി പ്രവർത്തിക്കുന്ന മുൻനിര ചെറുകിട ബാങ്കിംഗ് സ്ഥാപനങ്ങളിലൊന്നായ ഇസാഫ് സ്മോൾ ഫിനാൻസ് ബാങ്ക്, 2 മുതൽ 3 വർഷം വരെയുള്ള സ്ഥിര നിക്ഷേപത്തിന് 9% നിരക്കിൽ പലിശ വാഗ്ദാനം ചെയ്യുന്നു.
