തൊടുപുഴ: വാഗമണ്ണിലെത്തിയ ഇറ്റലിക്കാരനായ വിനോദസഞ്ചാരി താമസസൗകര്യം കിട്ടാതെ ഉറങ്ങിയത് പള്ളിസെമിത്തേരിയില്‍. ശനിയാഴ്ച രാത്രി വാഗമണ്ണിലെത്തിയ വിദേശ പൗരനാണു റിസോര്‍ട്ടുകളിലും ഹോട്ടലുകളിലും മുറി കിട്ടാത്തതിനെ തുടര്‍ന്നു സെമിത്തേരിയില്‍ കിടന്നുറങ്ങിയശേഷം മടങ്ങേണ്ടി വന്നത്. വിവരമറിഞ്ഞു പോലീസ് ഇയാളെ തേടിയിറങ്ങിയെങ്കിലും കണ്ടെത്തനായില്ല.
ഞായറാഴ്ച രാവിലെ 6.30-നു പള്ളിയിലേക്കു പോയവര്‍ വാഗമണ്‍ പുള്ളിക്കാനം റോഡിലെ ചര്‍ച്ച്‌ ഓഫ് ക്രൈസ്റ്റിന്റെ സെമിത്തേരിയില്‍നിന്ന് ഇയാള്‍ ഇറങ്ങിവരുന്നതു കണ്ടു പോലീസിനു വിവരം കൈമാറി. പക്ഷേ പോലീസ് എത്തുന്നതിനു തൊട്ടുമുന്‍പു വിദേശി ബസില്‍ കയറി പോയി. എട്ടുമണിക്കു കോട്ടയത്തേക്ക് പുറപ്പെടുന്ന ബസിലാണ് ഇയാള്‍ കയറിയതെന്നു നാട്ടുകാര്‍ പറയുന്നു.
ഫ്രഞ്ച് പൗരനായ മറ്റൊരു വിദേശിയെ വാഗമണ്ണില്‍നിന്നു നിരീക്ഷണത്തിനു ഇടുക്കി മെഡിക്കല്‍ കോളജിലെ ഐസലേഷന്‍ വാര്‍ഡിലേക്കു മാറ്റി. കൊറോണ ഭീതിയെ തുടര്‍ന്ന് വാഗമണ്ണിലെ റിസോര്‍ട്ടുകളും ഹോംസ്റ്റേകളും അടഞ്ഞു കിടക്കുകയാണ്.
