കൊല്ലം : ചെന്നൈയില്‍ കൊല്ലം സ്വദേശിനിയായ വിദ്യാര്‍ത്ഥിനി ട്രെയിന്‍ തട്ടി മരിച്ചു. കൊല്ലം പുത്തൂര്‍ സ്വദേശിനിയും താംബരം എംസിസികോളേജ് വിദ്യാര്‍ഥിനിയുമായ നിഖിത കെ.സിബി (19) ആണ് മരിച്ചത്. ഒന്നാം വര്‍ഷ ബിഎസ്സി സൈക്കോളജി വിദ്യാര്‍ഥിനിയായ നിഖിത ഇരുമ്പുലിയൂരിലെ ഹോസ്റ്റലിലായിരുന്നു താമസം. ഇരുമ്പുലിയൂരിലെ പഴയ റെയില്‍വേ ഗേറ്റിന് സമീപമുള്ള ട്രാക്ക് മുറിച്ചുകടക്കാന്‍ ശ്രമിച്ചപ്പോഴായിരുന്നു സംഭവം. ഹെഡ്‌ഫോണില്‍ സംസാരിച്ചു കൊണ്ട് ട്രാക്ക് മുറിച്ചു കടക്കുന്നതിനിടെ ട്രെയിന്‍ എത്തിയത് ശ്രദ്ധിക്കാന്‍ കഴിയാതെ പോയതാണ് അപകടത്തിനു കാരണമായതെന്നാണ് പോലീസിന്‍റെ പ്രാഥമിക നിഗമനം. ചെന്നൈ – ഗുരുവായൂര്‍ എക്‌സ്പ്രസ് തട്ടിയാണ് അപകടം. നിഖിത സംഭവ സ്ഥലത്തു തന്നെ മരിച്ചു.
