കൊച്ചി : ലിംഗമാറ്റ ശസ്ത്രക്രിയയെക്കുറിച്ച് പഠിക്കാന് വിദഗ്ദ്ധ സമിതിയെ വെക്കാന് തീരുമാനം. അനന്യ കുമാരിയുടെ മരണത്തെ തുടര്ന്ന് ഇന്ന് ട്രാന്സ്ജെന്റര് സമൂഹം നേരിടുന്ന വെല്ലുവിളികളെക്കുറിച്ച് ചര്ച്ച ചെയ്ത യോഗത്തിലാണ് തീരുമാനം. സാമൂഹ്യ നീതി വകുപ്പ് മന്ത്രി ആര് ബിന്ദുവാണ് ട്രാന്സ്ജെന്റര് ജസ്റ്റിസ് ബോര്ഡ് യോഗം വിളിച്ചത്.
ലിംഗമാറ്റ ശസ്ത്രക്രിയ, അനുബന്ധ സേവനം എന്നിവക്ക് പൊതുമാനദണ്ഡം തയ്യാറാക്കാനും യോഗത്തില് ധാരണയായി. നിലവില് സ്വകാര്യ മേഖലയിലെ ആശുപത്രികള് മുഖേനയാണ് സംസ്ഥാനത്ത് ലിംഗമാറ്റ ശസ്ത്രക്രിയകള് നടന്നു വരുന്നത്. ഇതില് ചികിത്സാ രീതികള്, ചികിത്സ ചിലവ്, തുടര്ചികിത്സ, ഗുണനിലവാരം എന്നിവ സംബന്ധിച്ച് ഒരു ഏകീകൃത മാനദണ്ഡം നിലവിലുള്ളതായി കാണുന്നില്ലെന്ന് യോഗം വിലയിരുത്തി.
സര്ക്കാര് മേഖലയില് ഡോക്ടര്മാര്ക്ക് വിദഗ്ധ പരിശീലനം നല്കി ലിംഗമാറ്റ ശസ്ത്രക്രിയകള് നടത്തുന്നതിനും, ലിംഗമാറ്റ ശസ്ത്രക്രിയകള്, അനുബന്ധമായ ആരോഗ്യസേവനങ്ങള് തുടങ്ങിയവ ട്രാന്ജന്ഡര് സമൂഹത്തിന് ഏറ്റവും അനുകൂലമായ രീതിയില് ലഭ്യമാക്കുന്നതിനെക്കുറിച്ചും ഇതിന് സ്വീകരിക്കേണ്ട നടപടികള് സംബന്ധിച്ചും വിദഗ്ധ സമിതി പരിശോധിക്കും. ട്രാന്സ്ജെന്ഡര് വ്യക്തികള്ക്കും ആരോഗ്യ ഇന്ഷുറന്സ് പദ്ധതി നടപ്പിലാക്കുന്നതും സര്ക്കാരിന്റെ ഭവന പദ്ധതിയില് മുന്ഗണനാ വിഭാഗമായി ട്രാന്സ്ജെന്ഡര് വ്യക്തികളെ ഉള്പ്പെടുത്തുന്നതിനും ആവശ്യമായ നടപടികള് സ്വീകരിക്കുന്നത് പരിശോധിക്കുന്നതിനും സാമൂഹ്യനീതി വകുപ്പ് ഡയറക്ടറെ യോഗം ചുമതലപ്പെടുത്തി.
പാഠ്യപദ്ധതികളിലും അദ്ധ്യാപക വിദ്യാര്ഥികളുടെ കരിക്കുലത്തിലും ട്രാന്സ്ജെന്റര് സമൂഹവുമായി ബന്ധപ്പെട്ട ബോധവത്കരണത്തിന് സഹായകരമായ പാഠ്യപദ്ധതികള് ഉള്പ്പെടുത്തുന്നത് പരിശോധിക്കാന് പൊതുവിദ്യാഭ്യാസ വകുപ്പിനോടും ഉന്നത വിദ്യാഭ്യാസ വകുപ്പിനോടും ആവശ്യപ്പെടാനും യോഗം തീരുമാനിച്ചു.
അനന്യ കുമാരി അലക്സിന്റെ നിര്യാണത്തില് യോഗം അനുശോചനം രേഖപ്പെടുത്തി. യോഗത്തില് സാമൂഹ്യനീതി വകുപ്പ് പ്രിന്സിപ്പല് സെക്രട്ടറി, സാമൂഹ്യനീതി ഡയറക്ടര്, ബോര്ഡിലെ ട്രാന്സ് പ്രതിനിധികള്, വിവിധ വകുപ്പിലെ ഉദ്യോഗസ്ഥര് എന്നിവര് പങ്കെടുത്തു.
