മൂവാറ്റുപുഴ: വിവാഹ വാഗ്ദാനം നല്കി ജോലിക്കാരി യുവതിയെ പീഡിപ്പിച്ച കേസിലെ പ്രതിയായ ട്രാവല് ഏജന്സി ഉടമ അറസ്റ്റില്. മൂവാറ്റുപുഴ പോസ്റ്റ് ഓഫീസ് ജങ്ഷനില് ട്രാവല് ഏജന്സി നടത്തിവരുന്ന പേഴക്കാപ്പിള്ളി കുളക്കാടന് കുഴിയില് അലിയാര് (അലി-49) ആണ് പിടിയിലായത്. സ്നേഹം നടിച്ച് പ്രലോഭിപ്പിച്ച് പീഡിപ്പിച്ച ശേഷം മതം മാറാനാവശ്യപ്പെട്ടെന്ന പരാതിയില് മൂവാറ്റുപുഴ പോലീസ് ഇയാളെ അറസ്റ്റ് ചെയ്തു. ചൊവ്വാഴ്ച ഉച്ചയോടെ പെരുമ്പാവൂരില് കാറില് യാത്ര ചെയ്യുന്നതിനിടെയാണ് പോലീസ് അറസ്റ്റ് ചെയ്തത്. ഇക്കഴിഞ്ഞ 18-നാണ് ഇയാള്ക്കെതിരെ കാഞ്ഞാര് സ്വദേശിനി പരാതി നല്കിയത്.
കഴിഞ്ഞ ഏപ്രിലില് ടൂര് ഏജന്സിയില് ജോലിക്കെത്തിയ തന്നെ ഒന്നര വര്ഷത്തോളം സ്ഥാപന ഉടമ പ്രലോഭിപ്പിച്ച് ഗോവ, മൈസൂരു, വാഗമണ് എന്നിവിടങ്ങളിലെ റിസോര്ട്ടുകളില് കൊണ്ടുപോയി പീഡിപ്പിച്ചെന്നും പിന്നീട് മതം മാറ്റാന് പ്രേരിപ്പിച്ചുവെന്നുമാണ് പരാതി. ഇതിനെത്തുടര്ന്ന് യുവതി ജോലി ഉപേക്ഷിച്ചു. ജോലിക്ക് വരാതായതോടെ സ്ഥാപന ഉടമ വീട്ടിലെത്തി ഭീഷണിപ്പെടുത്തിയതായും പരാതിയുണ്ട്. മതം മാറിയാല് സ്ഥാപന ഉടമ സാമ്പത്തിക സഹായവും സഹോദരിക്ക് വിദേശത്ത് ജോലിയും വാഗ്ദാനം ചെയ്തിരുന്നു എന്നും യുവതി പറയുന്നു. ഇയാളെ ചോദ്യം ചെയ്ത പോലീസ് തെളിവെടുപ്പിനായി വാഗമണ്ണിലേക്ക് കൊണ്ടുപോയി. ബുധനാഴ്ച കോടതിയില് ഹാജരാക്കി കസ്റ്റഡിയില് വാങ്ങി തുടര് തെളിവെടുപ്പുകള് നടത്തും.
