കൊട്ടാരക്കര: ഇടതു മുന്നണി വിട്ട് കോൺഗ്രസിൽ ചേർന്ന മുൻ എംഎൽഎ ഐഷ പോറ്റിക്ക് കൊട്ടാരക്കര കോൺഗ്രസ് ഭവനിൽ സ്വീകരണം നൽകി. കോൺഗ്രസ് പ്രവർത്തക സമിതി അംഗം കൊടിക്കുന്നിൽ സുരേഷ് എം പി ഐഷ പോറ്റിയെ സ്വീകരിച്ചു. ഇടതുപക്ഷത്തെ സാധാരണ പ്രവർത്തകരോട് ബഹുമാനമുണ്ടെന്നും അവരെ കുറ്റപ്പെടുത്താനില്ലെന്നും ഐഷ പോറ്റി പ്രസംഗത്തിൽ പറഞ്ഞു. എന്നാൽ സിപിഐഎം നേതൃനിരയിലെ ചിലരുടെ ഗൂഢാലോചനകൾ തനിക്കെതിരെ ഉണ്ടായിരുന്നുവന്നും തന്റെ പ്രവർത്തനങ്ങളെ അവഗണിക്കുകയും രാഷ്ട്രീയമായി ഒതുക്കാൻ ശ്രമിച്ചെന്നും ഐഷ പോറ്റി പറഞ്ഞു.
കൊട്ടാരക്കരയിലെ മുൻ എംഎൽഎ ആയിരുന്ന താൻ തുടങ്ങിവെച്ച വികസന പ്രവർത്തനങ്ങൾ പൂർത്തീകരിച്ചതിന്റെ ഉദ്ഘാടന ചടങ്ങുകളിൽ തന്റെ പേര് വെക്കാതെ ഉദ്യോഗസ്ഥരെ വിട്ട് ക്ഷണിക്കുന്ന പ്രവണതയുണ്ടായി. അത് ഏറെ വിഷമിപ്പിച്ചു. കൊട്ടാരക്കരയിൽ വിപ്ലവകരമായ വികസനം എത്തിക്കാൻ തനിക്ക് കഴിഞ്ഞെന്നും അവർ വ്യക്തമാക്കി.
