ചങ്ങനാശ്ശേരി : കല്യാണം കഴിഞ്ഞ് പത്താം നാൾ ഗൾഫുകാരൻ പറന്നു. മണവാട്ടിയാവട്ടെ പഴയ കാമുകനെ ഭർതൃവീട്ടിൽ വിളിച്ചുവരുത്തി, അതും പാതിരാത്രിയിൽ. വീട്ടുകാർക്ക് സംശയം തോന്നിയെന്ന് മനസിലാക്കിയ 19കാരി കാമുകനുമായി സ്ഥലം വിട്ടു, 10 പവന്റെ ആഭരണങ്ങളുമായി. കാമുകനാവട്ടെ, കഞ്ചാവ് കേസിലെ പ്രതിയും. ഇരുവരുടെയും മൊബൈൽ ഫോൺ ഓഫാണ്. എന്തായാലും തൃക്കൊടിത്താനം പോലീസ് ഇതേക്കുറിച്ച് അന്വേഷണം തുടങ്ങി.
ആറു മാസം മുൻപാണ് 19കാരിയും 21കാരനായ പ്രവാസിയുമായി കല്യാണം നടന്നത്. ആർഭാടമായിട്ടായിരുന്നു വിവാഹം. പത്താം ദിവസം യുവാവ് ജോലി സ്ഥലത്തേക്ക് മടങ്ങി. ഇതോടെ യുവതി ആകെ വിഷമത്തിലായി. ഭർത്താവ് ജോലി സ്ഥലത്തേക്ക് മടങ്ങുമ്പോൾ വിമാനത്താവളം വരെ ഒപ്പം പോയി. കരഞ്ഞു കലങ്ങിയ കണ്ണുമായി നിന്ന മരുമകളെ സാന്ത്വന വാക്കുകളോടെ അമ്മായിയമ്മ ആശ്വസിപ്പിച്ചു. അവളെയും കൂട്ടി വീട്ടിലേക്ക് മടങ്ങി.
മരുമകളും അമ്മായിയമ്മയും മാത്രമേ വീട്ടിൽ ഉണ്ടായിരുന്നുള്ളൂ. ദിവസങ്ങൾ കഴിഞ്ഞില്ല, പഴയ കാമുകൻ മൊബൈലിൽ വിളിച്ചു. ഇതോടെ യുവതിയുടെ ദു:ഖമെല്ലാം പമ്പകടന്നു. ഒരാൾ രാത്രിയിൽ വീട്ടിൽ വന്നുപോവുന്നുണ്ടെന്ന് അയൽവാസികളിൽ ആരോ ആണ് അമ്മായിയമ്മയോട് പറഞ്ഞത്. പക്ഷേ അവർ ആദ്യം വിശ്വസിച്ചില്ല. പിന്നീട് രണ്ടും കല്പിച്ച് അവർ മരുമകളോട് കാര്യങ്ങൾ തിരക്കി. പക്ഷേ പിറ്റെദിവസം മരുമകളെ കാണാതായി. ബന്ധുവീടുകളിലൊക്കെ അന്വേഷിച്ചെങ്കിലും ഒരു വിവരവും ലഭിച്ചില്ല. തുടർന്ന് തൃക്കൊടിത്താനം പോലീസ് സ്റ്റേഷനിലെത്തി പരാതി നല്കി. എന്നാൽ കാമുകനും കാമുകിയും സുഖമായി ജീവിക്കട്ടെയെന്നാണ് യുവതിയുടെ ഭർത്താവ് പറയുന്നത്.
