തിരുവനന്തപുരം : തലസ്ഥാനത്ത് ട്രിപ്പിള് ലോക്ക്ഡൗണില് ഇളവ് ഏര്പ്പെടുത്തി ജില്ലാഭരണകൂടം. പഴം, പച്ചക്കറി, പലവ്യഞ്ജന കടകള് എന്നിവ രാവിലെ ഏഴ് മുതല് പതിനൊന്ന് മണി വരെ തുറക്കാം. സാമൂഹ്യ അകലം പാലിച്ചാണ് കടകള് തുറക്കേണ്ടത്. നിയന്ത്രണങ്ങള് പാലിച്ചില്ലെങ്കില് കട അടപ്പിക്കുമെന്ന് മന്ത്രി കടകംപ്പള്ളി സുരേന്ദ്രന് അറിയിച്ചു. വീടിനടുത്തുള്ള കടകളില് നിന്ന് തന്നെ സാധനം വാങ്ങണമെന്നും മന്ത്രി വ്യക്തമാക്കി.
കുടുംബശ്രീ വഴി ജനകീയ ഹോട്ടലുകള് തുറക്കാനും തിരുവനന്തപുരം നഗരസഭ പദ്ധതിയിടുന്നുണ്ട്. ഹോം ഡെലിവറിയെ ആശ്രയിച്ച് നിരവധി പേരാണ് തലസ്ഥാന നഗരത്തില് കഴിയുന്നത്. ഇവര്ക്ക് ഭക്ഷണമെത്തിക്കാനാണ് കുടുംബശ്രീ ഹോട്ടലുകള് തുടങ്ങാന് പദ്ധതിയിടുന്നത്.
സമ്പര്ക്കരോഗികളുടെ എണ്ണം വര്ദ്ധിക്കുന്ന സാഹചര്യത്തില് തിരുവനന്തപുരത്ത് കൂടുതല് പരിശോധനകള് നടത്താനും തീരുമാനമായിട്ടുണ്ട്. പനി, ജലദോഷം തുടങ്ങിയവ ഉള്ളവര്ക്കും, സാമൂഹ്യ സമ്പര്ക്കം കൂടുതലുള്ള വിഭാഗങ്ങള്ക്കും പരിശോധന നടത്താനാണ് തീരുമാനിച്ചിരിക്കുന്നത്. രോഗം സ്ഥിരീകരിച്ചവരുടെ വിശദമായ പശ്ചാത്തലം എടുക്കും. രോഗികളുടെ ഉറവിടം കണ്ടെത്താന് തീവ്രശ്രമം നടക്കുന്നുണ്ടെന്നും ആരോഗ്യവകുപ്പ് അറിയിച്ചു. തിരുവനന്തപുരത്ത് തീവ്രബാധിത പ്രദേശങ്ങളില് കനത്ത ജാഗ്രതാനിര്ദ്ദേശം പുറപ്പെടുവിച്ചിട്ടുണ്ട്.
