വാഷിംഗ്ടൺ: വരുംദിവസങ്ങളിൽ ഇറാനുമായുള്ള സമാധാന ചർച്ചകളിൽ വലിയ പുരോഗതിയുണ്ടാകുമെന്ന് അമേരിക്കൻ പ്രസിഡന്റ് ഡോണൾഡ് ട്രംപ് പ്രത്യാശ പ്രകടിപ്പിച്ചു. വെള്ളിയാഴ്ചയോടെ വിഷയത്തിൽ ഒരു ശുഭവാർത്ത പ്രതീക്ഷിക്കാമെന്നാണ് ട്രംപ് നൽകിയ സൂചന. പാകിസ്ഥാന്റെ മധ്യസ്ഥതയിൽ നടക്കുന്ന നീക്കങ്ങൾ ഫലം കാണുമെന്നും അടുത്ത 72 മണിക്കൂറിനുള്ളിൽ ചർച്ചകൾ പുനരാരംഭിക്കാൻ സാധ്യതയുണ്ടെന്നും അദ്ദേഹം വ്യക്തമാക്കി. എന്നാൽ, ട്രംപിന്റെ ഈ അവകാശവാദത്തെ ഇറാൻ പൂർണ്ണമായും തള്ളി. വെള്ളിയാഴ്ച ചർച്ചകൾ നടത്താൻ തീരുമാനമെടുത്തിട്ടില്ലെന്നും ട്രംപ് കള്ളം പറയുകയാണെന്നും ഇറാന്റെ ഔദ്യോഗിക വാർത്താ ഏജൻസിയായ തസ്നിം ന്യൂസ് പ്രതികരിച്ചു.പാകിസ്ഥാൻ സൈനിക മേധാവി ആസിം മുനീർ, പ്രധാനമന്ത്രി ഷെഹ്ബാസ് ഷെരീഫ് എന്നിവരുടെ അഭ്യർത്ഥന മാനിച്ചാണ് ഇറാനെതിരായ സൈനിക നടപടികൾ അമേരിക്ക താൽക്കാലികമായി നിർത്തിവെച്ചത്. ഇറാൻ ഭരണകൂടത്തിനുള്ളിലെ ഭിന്നതകൾ പരിഗണിച്ചും, സമാധാനത്തിനായി ഒരു ഏകീകൃത നിർദ്ദേശം സമർപ്പിക്കാൻ അവർക്ക് സമയം നൽകുന്നതിനുമാണ് ഈ വെടിനിർത്തൽ. മുൻപ് നൽകിയ സമയപരിധി അവസാനിച്ചാൽ ബോംബാക്രമണം പുനരാരംഭിക്കുമെന്ന് മുന്നറിയിപ്പ് നൽകിയിരുന്ന ട്രംപ്, ഇപ്പോൾ നയതന്ത്ര ചർച്ചകൾക്ക് വഴിമാറിയത് വലിയ മാറ്റമായാണ് വിലയിരുത്തപ്പെടുന്നത്. ട്രംപിന്റെ ഈ തീരുമാനത്തെ പാകിസ്ഥാൻ പ്രധാനമന്ത്രിയും ഐക്യരാഷ്ട്രസഭയും സ്വാഗതം ചെയ്തിട്ടുണ്ട്.
സമാധാന ശ്രമങ്ങൾ ഒരുവശത്ത് നടക്കുമ്പോഴും ഹോർമുസ് കടലിടുക്കിലെ സൈനിക ജാഗ്രത കുറയ്ക്കാൻ അമേരിക്ക തയ്യാറായിട്ടില്ല. ഇറാനുമേലുള്ള നാവിക ഉപരോധം തുടരാൻ ട്രംപ് സൈന്യത്തിന് കർശന നിർദ്ദേശം നൽകി. ഏത് സാഹചര്യത്തെയും നേരിടാൻ സൈന്യം സജ്ജമായിരിക്കണമെന്നും ഇറാന്റെ ഭാഗത്തുനിന്നുള്ള വ്യക്തമായ നിർദ്ദേശം ലഭിക്കുന്നത് വരെ ആക്രമണം നിർത്തിവെക്കുന്നുവെന്നുമാണ് ട്രംപിന്റെ നിലപാട്. അമേരിക്ക സമയപരിധി നിശ്ചയിക്കാതെ വെടിനിർത്തൽ നീട്ടുന്നത് ഇതാദ്യമായാണ്. എങ്കിലും, ഇറാൻ ഈ നീക്കങ്ങളെ സംശയത്തോടെയാണ് നോക്കിക്കാണുന്നത്.
