റാന്നി : നിർമ്മാണം പുരോഗമിക്കുന്ന ഇട്ടിയപ്പാറ-ബംഗ്ലാംകടവ് റോഡിൽ കുഴി രൂപപ്പെട്ടത് യാത്രക്കാരെയും പ്രദേശവാസികളെയും ഒരുപോലെ ദുരിതത്തിലാക്കുന്നു. ബി.എം ആൻഡ് ബി.സി നിലവാരത്തിൽ നിർമ്മിക്കുന്ന റോഡിലാണ് ടാറിങ് പൂർത്തിയായി ദിവസങ്ങൾക്കകം തന്നെ വിള്ളലും കുഴിയും പ്രത്യക്ഷപ്പെട്ടത്. കോളേജ് ജംഗ്ഷന് സമീപമാണ് കുഴി രൂപപെട്ടത്. വർഷങ്ങളായി കുഴികൾ നിറഞ്ഞ് പൂർണ്ണമായി തകർന്നു കിടന്നിരുന്ന ഈ റോഡിന്റെ പുനരുദ്ധാരണം ഏറെ പ്രതീക്ഷയോടെയാണ് നാട്ടുകാർ കണ്ടിരുന്നത്.
പഴയ ടാറിങ് പൂർണ്ണമായി ഇളക്കിമാറ്റി യന്ത്ര സംവിധാനങ്ങൾ ഉപയോഗിച്ച് കൃത്യമായ അളവിൽ മെറ്റലിങ് നടത്തി ബി.എം ടാറിങ് പൂർത്തിയാക്കിയ ഭാഗത്താണ് ഇപ്പോൾ കുഴി രൂപപ്പെട്ടത്. ഉയർന്ന നിലവാരത്തിൽ നിർമ്മിക്കുന്ന റോഡിൽ ഇത്ര പെട്ടെന്ന് കുഴികൾ രൂപപ്പെട്ടത് നിർമ്മാണത്തിലെ അപാകത മൂലമാണെന്ന് ആക്ഷേപമുയർന്നിട്ടുണ്ട്. വൻ തുക ചെലവഴിച്ച് നടത്തുന്ന നിർമ്മാണ പ്രവൃത്തികളുടെ ഗുണനിലവാരം ഉറപ്പാക്കാൻ അധികൃതർ അടിയന്തരമായി ഇടപെടണമെന്നും രൂപപ്പെട്ട കുഴികൾ ഉടൻ പരിഹരിക്കണമെന്നും നാട്ടുകാർ ആവശ്യപ്പെട്ടു.
