കോട്ടയം : തലയോലപ്പറമ്പില് വിഷക്കായ കഴിച്ച് ആത്മഹത്യക്ക് ശ്രമിച്ച സുഹൃത്തുക്കളായ പെണ്കുട്ടികളില് ഒരാള് മരിച്ചു. തലയോലപ്പറമ്പ്, വെള്ളൂര് സ്വദേശികളായ പെണ്കുട്ടികളാണ് വിഷക്കായ കഴിച്ചത്. ഇതില് തലയോലപ്പറമ്പ് സ്വദേശിനിയാണ് മരിച്ചത്. വെള്ളൂര് സ്വദേശിനിയായ പെണ്കുട്ടി ഗുരുതരാവസ്ഥയില് ചികിത്സയിലാണ്. വീട്ടില് വഴക്ക് പറഞ്ഞതിനെ തുടര്ന്നാണ് ആത്മഹത്യയെന്ന് ബന്ധുക്കള് പോലീസിന് മൊഴി നല്കി. സമൂഹമാധ്യമങ്ങള് വഴിയാണ് ഇരുവരും സുഹൃത്തുക്കളായത്. പിന്നീട് റീല്സ് വീഡിയോകള്ക്കായി ഇരുവരും ഒന്നിച്ച് വിവിധ സ്ഥലങ്ങളില് സഞ്ചരിക്കുകയും പതിവായിരുന്നു. ഇത് വീട്ടുകാര് വിലക്കിയതോടെ ഇരുവരും വിഷമത്തിലായി.
തിങ്കളാഴ്ച വെള്ളൂര് സ്വദേശി സ്വന്തം വീട്ടില് വച്ച് വിഷക്കായ കഴിച്ചു. ഇതോടെ ബന്ധുക്കള് കുട്ടിയെ ആശുപത്രിയില് പ്രവേശിപ്പിച്ചു. പിന്നീട് ചികിത്സകള്ക്ക് ശേഷം പെണ്കുട്ടിയെ വീട്ടിലേക്ക് അയച്ചെങ്കിലും ചൊവ്വാഴ്ച വൈകിട്ടോടെ പെണ്കുട്ടിയുടെ ആരോഗ്യസ്ഥിതി വീണ്ടും മോശമായി. ഇതറിഞ്ഞ തലയോലപ്പറമ്പ് സ്വദേശി വീട്ടില് വെച്ച് വിഷക്കായ കഴിച്ചു. ഈ കുട്ടിയാണ് ഇന്ന് രാവിലെ കോട്ടയം മെഡിക്കല് കോളജ് ആശുപത്രിയില് മരിച്ചത്. വെള്ളൂര് സ്വദേശിനിയായ പെണ്കുട്ടി നേരത്തെ പോക്സോ കേസില് ഇരയായിരുന്നു. എന്നാല് ഈ കേസുമായി ആത്മഹത്യാശ്രമത്തിന് ബന്ധമില്ലെന്ന് പോലീസ് പറഞ്ഞു.