തിരുവനന്തപുരം: മെഡിക്കല് കോളജില് രോഗിയെ പുഴുവരിച്ച സംഭവം ജീവനക്കാരുടെ വീഴ്ച്ച മൂലമാണെന്ന് മെഡിക്കല് വിദ്യാഭ്യാസ ഡയറക്ടറുടെ പ്രാഥമിക അന്വേഷണ റിപ്പോര്ട്ടില് പറയുന്നു. തുടര്നടപടിക്ക് ശുപാര്ശയുമായി റിപ്പോര്ട്ട് ആരോഗ്യമന്ത്രിക്ക് കൈമാറും. മതിയായ ചികിത്സ ലഭിച്ചില്ലെന്ന് മകള് പരാതിപ്പെട്ടിരുന്നുവെന്നും റിപ്പോര്ട്ടില് പറയുന്നു.
കഴുത്തിന് താഴേയ്ക്ക് തളര്ന്ന വട്ടിയൂര്ക്കാവ് സ്വദേശി അനില്കുമാറിനെയാണ് പുഴുവരിച്ച നിലയില് കണ്ടെത്തിയത്. ഓഗസ്റ്റ് 21 ന് പണി കഴിഞ്ഞ് മടങ്ങിവരും വഴി തെന്നി വീണ് അനില്കുമാറിന് പരുക്കേറ്റിരുന്നു. ശരീരത്തില് തളര്ച്ച ബാധിച്ചിരുന്ന അനില്കുമാറിന് ഈ മാസം ആറിന് കൊവിഡ് സ്ഥിരീകരിച്ചിരുന്നു. ഇതേ തുടര്ന്ന് ഒപ്പമുണ്ടായിരുന്ന കുടുംബാംഗങ്ങളോട് ക്വാറന്റീനില് പോകാന് ആവശ്യപ്പെട്ടു. 26ന് അനില്കുമാറിന് കൊവിഡ് നെഗറ്റീവായി. തുടര്ന്ന് വീട്ടില് എത്തിച്ചപ്പോഴാണ് ശരീരമാസകലം പുഴുവരിച്ച നിലയില് കണ്ടെത്തിയത്.
