കോഴിക്കോട്: താമരശ്ശേരിയില്‍ പ്രവാസിയെ തട്ടിക്കൊണ്ടുപോയ കേസില്‍ രണ്ട് പേര്‍ അറസ്റ്റില്‍. പരപ്പന്‍പോയില്‍ സ്വദേശി നിസാര്‍, പൂനൂര്‍ നേരോത്ത് സ്വദേശി അജ്‌നാസ് എന്നിവരാണ് അറസ്റ്റിലായത്. ഷാഫിയുടെ വീട്ടില്‍ നേരത്തെ എത്തി ഭീഷണിപ്പെടുത്തിയെന്ന പരാതിയിലാണ് അറസ്റ്റ്. വെള്ളിയാഴ്ചയാണ് താമരശ്ശേരി പരപ്പന്‍പൊയിലിലെ വീട്ടില്‍ നിന്ന് ഷാഫിയെയും ഭാര്യ സനിയയെയും നാലംഗ സംഘം തട്ടിക്കൊണ്ടു പോയത്. തട്ടിക്കൊണ്ടുപോകലിന് പിന്നില്‍ സാമ്പത്തിക ഇടപാടുകളാണെന്ന നിഗമനത്തിലാണ് പോലീസ്.
തട്ടിക്കൊണ്ടു പോകാനുപയോഗിച്ച കാറിന്റെ സിസിടിവി ദൃശ്യങ്ങള്‍ നേരത്തെ പുറത്തുവന്നിരുന്നു. പ്രവാസിയുമായി പോകുന്ന വെള്ള നിറത്തിലുള്ള മാരുതി സ്വിഫ്റ്റ് കാറിന്റെ ദൃശ്യങ്ങളാണ് പുറത്തുവന്നത്. കെ എല്‍ 16 ക്യു 7001 എന്ന നമ്പരാണ് കാറിന്റേതെന്ന് വ്യക്തമായിരുന്നു. ഷാഫിയുടെ വീടിന് സമീപത്തെ കടയിലെ സിസിടിവി ക്യാമറയിലാണ് കാറിന്റെ ദൃശ്യങ്ങള്‍ പതിഞ്ഞത്. ആറ്റിങ്ങല്‍ രജിസ്ട്രേഷനാണ് നമ്പരെങ്കിലും മലപ്പുറം ആര്‍ ടി ഓഫീസിന് കീഴിലാണ് ഇപ്പോള്‍ വണ്ടിയുള്ളത്.
