ദില്ലി: മുഖ്യമന്ത്രി പിണറായി വിജയന്റെ യുഎഇ സന്ദര്ശനം റദ്ദാക്കി. പ്രധാനമന്ത്രിയുടെ ഓഫീസിന്റെ അനുമതി കിട്ടാനുള്ള നീക്കവും പരാജയപ്പെട്ടതോടെയാണ് മുഖ്യമന്ത്രി യാത്ര ഉപേക്ഷിച്ചത്. മുഖ്യമന്ത്രി പങ്കെടുക്കേണ്ട പ്രാധാന്യം ഇല്ലെന്ന് വ്യക്തമാക്കിയാണ് അബുദാബി ഇന്വെസ്റ്റ്മെന്റ് മീറ്റില് പങ്കെടുക്കുന്നത് കേന്ദ്രം വിലക്കിയത്. മേയ് 8 മുതല് 10 വരെ അബുദാബി നാഷനല് എക്സിബിഷന് സെന്ററില് നടക്കുന്ന വാര്ഷിക നിക്ഷേപക സംഗമത്തില് (എയിം ഗ്ലോബല് 2023) പങ്കെടുക്കാനാണ് മുഖ്യമന്ത്രി യാത്ര പ്ലാന് ചെയ്തത്. മന്ത്രിമാരായ പി.രാജീവ്, പി.എ.മുഹമ്മദ് റിയാസ്, ചീഫ് സെക്രട്ടറി വി.പി.ജോയ് എന്നിവരടങ്ങുന്ന 9 അംഗ സംഘമാണ് യാത്രയില് ഉള്പ്പെട്ടിരുന്നത്.
യുഎഇ വാണിജ്യസഹമന്ത്രിയാണ് നിക്ഷേപ സംഗമത്തില് പങ്കെടുക്കുന്നതിനുള്ള ക്ഷണക്കത്ത് നല്കിയത്. കേരളത്തിന് നേരിട്ട് നല്കിയ കത്ത് കൂടി കേന്ദ്ര അനുമതി തേടിയുള്ള അപേക്ഷയില് മുഖ്യമന്ത്രിയുടെ ഓഫീസ് ഉള്പ്പെടുത്തിയിരുന്നു. അനുമതി തേടിയുള്ള ഫയല് വിദേശകാര്യമന്ത്രി എസ് ജയശങ്കര് നേരിട്ടു പരിശോധിച്ചു. ഇതിന് ശേഷമാണ് മുഖ്യമന്ത്രിയോ മന്ത്രിമാരോ പങ്കെടുക്കേണ്ടതില്ല എന്ന നിലപാട് വിദേശകാര്യമന്താലയം കേരളത്തെ അറിയിച്ചത്.