മുംബൈ: ഉത്തര്പ്രദേശിലെ അയോധ്യയില് രാമക്ഷേത്രം ഉദ്ഘാടനം ചെയ്യാനിരിക്കെ, ഗൂഢാലോചനയ്ക്കു സാധ്യതയെന്ന ആരോപണവുമായി മഹാരാഷ്ട്ര മുന് മുഖ്യമന്ത്രിയും ശിവസേനാ നേതാവുമായ ഉദ്ധവ് താക്കറെ. ‘ഗോധ്ര പോലുള്ള’ ഗൂഢാലോചനയ്ക്കു സാധ്യതയുണ്ടെന്നാണ് ഉദ്ധവിന്റെ മുന്നറിയിപ്പ്.ലോക്സഭാ തിരഞ്ഞെടുപ്പിനു മുന്പായി ജനുവരിയില് രാമക്ഷേത്രം ഭക്തര്ക്കു തുറന്നു കൊടുക്കാനിരിക്കെയാണ് ഉദ്ധവിന്റെ പ്രസ്താവന. ”രാമക്ഷേത്രം തുറക്കുന്ന ചടങ്ങിന്റെ പേരില് ഗോധ്രയിലേതു പോലുള്ള സംഭവത്തിനു ഗൂഢാലോചന നടക്കുന്നുണ്ട്. ചടങ്ങില് രാജ്യത്തിന്റെ വിവിധ ഭാഗങ്ങളിലെ ആയിരക്കണക്കിനു ഹിന്ദുക്കള് പങ്കെടുക്കും. ബസിലും ട്രെയിനും ട്രക്കിലും മറ്റുമായാണ് ഇവരെത്തുക. ഇവര് മടങ്ങിപ്പോകുമ്പോള് എവിടെവച്ചെങ്കിലും ഗോധ്ര പോലെ സംഭവിച്ചേക്കാം.
അങ്ങനെ സംഭവിക്കാനാണു സാധ്യത. ചില കോളനികളില് അവര് ബസിനു തീവച്ചേക്കും. വാഹനങ്ങള്ക്കുനേരെ കല്ലുകളെറിയും. കൂട്ടക്കൊലകള് ഉണ്ടായേക്കും. അങ്ങനെ രാജ്യത്തു വീണ്ടും കലാപത്തീ ഉയരും. ഈ അഗ്നിനാളത്തില്നിന്ന് അവര് രാഷ്ട്രീയത്തിന്റെ അപ്പം ചുട്ടെടുക്കും.”- ശിവസേനാ (യുബിടി) നേതാവ് ഉദ്ധവ് താക്കറെ പറഞ്ഞു.
