കോന്നി : കെ.എസ്.ആര്.റ്റി.സി ബസ് സര്വ്വീസുകള് നിലച്ചുപോയ തണ്ണിത്തോട് ഗ്രാമപഞ്ചായത്തില് നിന്നടക്കം മൂന്ന് ദീര്ഘദൂര സര്വീസുകള് അനുവദിച്ച് യു.ഡി.എഫ് സര്ക്കാര്. കരിമാന്തോട് – തണ്ണിത്തോട് – തൃശൂര്, ആങ്ങമൂഴി – തണ്ണിത്തോട് – തിരുവനന്തപുരം എയര്പോര്ട്ട്, കരിമാന്തോട് – ചെങ്ങന്നൂര് എന്നീ റൂട്ടുകളിലേക്കാണ് പുതിയ ബസുകള് അനുവദിച്ചത്. കോവിഡ് കാലഘട്ടത്തില് തണ്ണിത്തോട് നിന്നും ഉണ്ടായിരുന്ന കെ.എസ്.ആര്.റ്റി.സി സര്വ്വീസുകള് താത്കാലികമായി നിര്ത്തലാക്കിയിരുന്നു. ഇതിന് ശേഷം ജില്ലയിലെ മറ്റ് സര്വീസുകള് പുനരാരംഭിച്ചിട്ടും തണ്ണിത്തോട് ഭാഗത്തേക്ക് മാത്രം കെ.എസ്.ആര്.റ്റി.സി സര്വീസ് ആരംഭിച്ചില്ല. ഇതിന് ശേഷം നിരവധി ജനകീയ പ്രക്ഷോഭങ്ങള് നടക്കുകയും കോന്നി എം.എല്.എ യുടെ നേതൃത്വത്തില് ഒരു ബസ് വരികയും ചെയ്തിരുന്നു. എന്നാല് പിന്നീട് ഇതും മുടങ്ങിയിരുന്നു.
ഈ റൂട്ടില് കെ.എസ്.ആര്.റ്റി.സി സര്വ്വീസ് മുടക്കിയപ്പോള് റൂട്ടുകള് മുഴുവന് സ്വകാര്യ ബസുകള് കയ്യടക്കിയിരുന്നു. ഇതോടെ തണ്ണിത്തോട് പഞ്ചായത്തില് കൂടി ഒരു കെ.എസ്.ആര്.റ്റി.സി പോലും ഇല്ലാതെയായി. സര്ക്കാരിന് വലിയ ലാഭം നേടിക്കൊടുത്തിരുന്ന സര്വീസുകളായിരുന്നു നിലച്ച് പോയത്. ഇതിനാല് തന്നെ കെ.എസ്.ആര്.റ്റി.സി ക്ക് വലിയ നഷ്ടവും സംഭവിച്ചിരുന്നു. ഇതിന് ശേഷമാണ് യു.ഡി.എഫ് ഭരണത്തില് എത്തിയപ്പോള് മൂന്ന് ബസുകള് മലയോര മേഖലയിലേക്ക് വീണ്ടും അനുവദിച്ചത്.
