പത്തനംതിട്ട : തദ്ദേശസ്വയംഭരണ സ്ഥാപന തെരഞ്ഞെടുപ്പില് യു.ഡി.എഫിനുണ്ടായ തിളക്കമാര്ന്ന വിജയം നിയമസഭാ തെരഞ്ഞെടുപ്പിലും ആവര്ത്തിക്കുമെന്ന് കെ.പി.സി.സി കോര് കമ്മിറ്റി അംഗം പ്രൊഫ. പി.ജെ. കുര്യന് പറഞ്ഞു. ജില്ലാ കോണ്ഗ്രസ് കമ്മിറ്റിയുടെ നേതൃത്വത്തില് തെരഞ്ഞെടുപ്പ് മുന്നൊരുക്കങ്ങള്ക്കായി ചേര്ന്ന പ്രവര്ത്തകയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
നിയമസഭാ തെരഞ്ഞെടുപ്പില് വിജയസാധ്യത മാത്രം മാനദണ്ഡമാക്കിയായിരിക്കും ഹൈക്കമാന്ഡ് സ്ഥാനാര്ത്ഥി നിര്ണയം നടത്തുന്നതെന്നും ആര് സ്ഥാനാര്ത്ഥിയായി വന്നാലും ജില്ലയിലെ 5 നിയോജക മണ്ഡലങ്ങളിലും കോണ്ഗ്രസ് പ്രവര്ത്തകര് കയ്യും, മെയ്യും മറന്ന് ആത്മാര്ത്ഥമായി പ്രവര്ത്തിച്ച് വിജയിപ്പിക്കണമെന്നും പ്രൊഫ. പി.ജെ. കുര്യന് പറഞ്ഞു.
ശബരിമലയില് സര്ക്കാരിന്റെയും ദേവസ്വം ബോര്ഡിന്റേയും നേതൃത്വത്തില് നടത്തിയ ആഗോള അയ്യപ്പ സംഗമം ആഗോള തട്ടിപ്പും അഴിമതിയുമായിരുന്നുവെന്നും ഇതേക്കുറിച്ച് വിശ്വാസ യോഗ്യമായ ഏജന്സികളെക്കൊണ്ട് സമഗ്രമായ അന്വേഷണം നടത്തി അഴിമതിക്കാരെ ശിക്ഷിക്കണമെന്നും ഡി.സി.സി യോഗം ആവശ്യപ്പെട്ടു. എസ്.ഐ.ആര് ലിസ്റ്റ് പ്രസിദ്ധീകരണത്തിന് ശേഷം വോട്ടര് പട്ടികയില് പേര് ഉള്പ്പെടുന്നതിന് തീവ്രമായ പ്രവര്ത്തനങ്ങള് നടത്തുന്നതിനും, കെ.പി.സി.സി നിര്ദ്ദേശാനുസരണം ഫെബ്രുവരി 23 മുതല് 30 വരെ ബൂത്ത് കോണ്ഗ്രസ് കമ്മിറ്റികളുടെ നേതൃത്വത്തില് സംഘടിപ്പിക്കന്ന ഭവന സന്ദര്ശന പരിപാടിയും, 27 ന് ജില്ലയില് എത്തുന്ന യു.ഡി.എഫ് പുതുയുഗ യാത്രക്ക് ജില്ലയിലെ അഞ്ച് നിയോജക മണ്ഡലം കേന്ദ്രങ്ങളില് നടത്തുന്ന സ്വീകരണ പരിപാടികള് വിജയിപ്പിക്കുന്നതിനും യോഗം തീരുമാനിച്ചു.
ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പില് അദ്ധ്യക്ഷത വഹിച്ചു. കെ.പി.സി.സി ജനറല് സെക്രട്ടറി പഴകുളം മധു, കെ.പി.സി.സി നയരൂപീകരണ സമിതി ചെയര്മാന് ജെ.എസ്. അടൂര്, നേതാക്കളായ എ. ഷംസുദ്ദീന്, മാലേത്ത് സരളാദേവി, ജോര്ജ് മാമ്മന് കൊണ്ടൂര്, റിങ്കു ചെറിയാന്, കെ. ജെയവര്മ്മ, അനീഷ് വരിക്കണ്ണാമല, എ. സുരേഷ് കുമാര്, വെട്ടൂര് ജ്യോതിപ്രസാദ്, സാമുവല് കിഴക്കുപുറം, സജി കൊട്ടയ്ക്കാട്, കെ. ജാസിംകുട്ടി, ജോണ്സണ് വിളവിനാല്, റെജി തോമസ്, അജീബ .എം സാഹിബ്, ജി. സതീഷ് ബാബു, ലിജു ജോര്ജ്, ഷാം കുരുവിള, കോശി .പി സക്കറിയ, അബ്ദുള്കലാം ആസാദ് എന്നിവര് പ്രസംഗിച്ചു.
