പത്തനംതിട്ട : പത്തനംതിട്ട കെ.എസ്.ആര്.റ്റി.സി ടെര്മിനലിന്റെ വാഹന പാര്ക്കിംഗ് സ്ഥലത്ത് തുറന്നു കിടക്കുന്ന മാന്ഹോള് ജനങ്ങള്ക്ക് ഭീഷണിയാകുന്നു. ടെര്മിനലിന്റെ ഓടയുടെ ഭാഗമായി നിര്മ്മിച്ച മാന്ഹോളാണ് അപകടകരമായ രീതിയില് തുറന്നിട്ടിരിക്കുന്നത്. എന്നാല് ഇവിടെ യാതൊരു സുരക്ഷാ നടപടികളും ഇതുവരെ സ്വീകരിച്ചിട്ടില്ല. ഇരുചക്ര വാഹനങ്ങള് പാര്ക്ക് ചെയ്യുന്ന സ്ഥലത്തിന് അടുത്താണ് ഇത്തരത്തില് ഒരു അപകടക്കെണി ഒരുക്കിയിട്ടുള്ളത്. പകല് സമയങ്ങളില് പോലും ഇത് ശ്രദ്ധയില്പ്പെടാതെ ആളുകള് ഇതിനുള്ളില് വീഴാനുള്ള സാധ്യത ഏറെയാണ്. രാത്രിയില് മാന് ഹോളുള്ള ഭാഗത്ത് വെളിച്ചവുമില്ല.
വിഷയം യാത്രക്കാര് ശ്രദ്ധയില്പ്പെടുത്തിയിട്ടും കെ.എസ്.ആര്.റ്റി.സി നടപടി സ്വീകരിക്കുന്നില്ല എന്നാണ് പരാതിയുയരുന്നത്. കൊച്ചു കുട്ടികള് ഉള്പ്പെടെ ഇതിന് സമീപത്ത് കൂടി നടന്നു പോകുന്നത് അത്യധികം ഗൗരവകരമായി കാണേണ്ടിയിരുന്നിട്ടും അധികാരികള് ഈ അപകടക്കെണി കണ്ടില്ലെന്ന് നടിക്കുകയാണെന്നാണ് പത്തനംതിട്ട കെ.എസ്.ആര്.റ്റി.സി സ്റ്റാന്റില് എത്തുന്ന യാത്രകാര് പറയുന്നത്.
