കൊച്ചി: ലോക്സഭാ തിരഞ്ഞെടുപ്പില്‍ ബിജെപി സ്ഥാനാര്‍ത്ഥിയായേക്കുമെന്ന അഭ്യൂഹങ്ങള്‍ തള്ളി നടന്‍ ഉണ്ണി മുകുന്ദന്‍. രാഷ്ട്രീയത്തില്‍ ചേരുമെന്ന വാര്‍ത്ത വ്യാജമാണെന്നും നടന്‍ അറിയിച്ചു. സോഷ്യല്‍ മീഡിയ പോസ്റ്റിലൂടെയാണ് താരം ഇക്കാര്യം അറിയിച്ചത്. പാലക്കാട് നിന്നോ തിരുവനന്തപുരത്തുനിന്നോ ബിജെപി സ്ഥാനാര്‍ഥിയായി ഉണ്ണി മുകുന്ദന്‍ മത്സരിക്കുമെന്ന പ്രചാരണം വ്യാപകമായതോടെയാണ് വിശദീകരണവുമായി താരം രംഗത്തെത്തിയത്.
‘ഞാന്‍ രാഷ്ട്രീയത്തില്‍ ചേരുമെന്ന വാര്‍ത്ത ഇപ്പോള്‍ അറിഞ്ഞു. അത് വ്യാജമാണ്. ഞാന്‍ ഇപ്പോള്‍ ഗാന്ധര്‍വ ജൂനിയര്‍ എന്ന സിനിമയില്‍ അഭിനയിച്ചു കൊണ്ടിരിക്കുകയാണ്. അതൊരു നീണ്ട ഷെഡ്യൂളാണ്. കൂടൂതല്‍ വിവരങ്ങള്‍ വഴിയേ അറിയിക്കാം. വാര്‍ത്തകള്‍ സംപ്രേക്ഷണം ചെയ്യുന്നതിന് മുന്‍പ് അതിന്റെ നിജസ്ഥിതിയെക്കുറിച്ച് അന്വേഷിക്കണമെന്നാണ് എനിക്ക് മാധ്യമങ്ങളോട് അഭ്യര്‍ത്ഥിക്കാനുള്ളത്. വീണ്ടും വീണ്ടും കാര്യങ്ങള്‍ ബോധിപ്പിക്കേണ്ടിവരുന്നത് ഖേദകരമാണ്. സമൂഹത്തില്‍ ഉണ്ടാക്കുന്ന സ്വാധീനത്തേക്കുറിച്ച് ബോധ്യമുള്ളതുകൊണ്ട് എനിക്ക് രാഷ്ട്രീയത്തോടും രാഷ്ട്രീയക്കാരോടും ഒരുപോലെ ബഹുമാനമുണ്ട്. ഞാന്‍ രാഷ്ട്രീയപ്രവര്‍ത്തനം നിസ്സാരമായി കാണുന്നില്ല.’ ഉണ്ണി മുകുന്ദന്‍ വ്യക്തമാക്കി.
