കൊച്ചി : അന്തരിച്ച നടന് രാജന് പി. ദേവിന്റെ മകന് ഉണ്ണി രാജനെ 14 ദിവസത്തേക്ക് റിമാന്ഡ് ചെയ്തു. ഭാര്യയുടെ ആത്മഹത്യയുമായി ബന്ധപ്പെട്ട് തിരുവനന്തപുരം നെടുമങ്ങാട് കോടതിയാണ് ഉണ്ണി രാജനെ 14 ദിവസത്തേക്ക് റിമാന്ഡ് ചെയ്തത്.
കേസുമായി ബന്ധപ്പെട്ട് കഴിഞ്ഞ ദിവസമാണ് ഉണ്ണി രാജന് അറസ്റ്റിലാകുന്നത്. നെടുമങ്ങാട് ഡിവൈ.എസ്.പി ഉമേഷ് കുമാറിന്റെ നേതൃത്വത്തിലുള്ള പ്രത്യേക അന്വേഷണസംഘമാണ് ഇയാളെ അങ്കമാലി കറുകുറ്റിയിലെ വീട്ടില്നിന്ന് അറസ്റ്റ് ചെയ്തത്.
മേയ് 12നാണ് ഉണ്ണിരാജന്റെ ഭാര്യ പ്രിയങ്ക(25)യെ തേക്കടയിലുള്ള കുടുംബവീട്ടില് തൂങ്ങിമരിച്ച നിലയില് കണ്ടത്. മരിക്കുന്നതിന് തലേദിവസം വരെ അങ്കമാലിയിലെ ഭര്തൃഗൃഹത്തിലായിരുന്നു പ്രിയങ്ക. സഹോദരനെ വിളിച്ചുവരുത്തി കൂടെപോന്ന പ്രിയങ്ക വീട്ടിലെത്തിയശേഷം ഭര്ത്താവില്നിന്ന് സ്ത്രീധനത്തെ ചൊല്ലി തനിക്ക് നേരിടേണ്ടിവന്ന ശാരീരികവും മാനസികവുമായ പീഡനങ്ങള് കാണിച്ച് വട്ടപ്പാറ പോലീസില് പരാതി നല്കുകയും അടുത്തദിവസം ജീവനൊടുക്കുകയുമായിരുന്നു. പ്രിയങ്കയുടെ മരണത്തില് കേസെടുത്ത വട്ടപ്പാറ പോലീസ് അന്വേഷണം നടത്തിക്കൊണ്ടിരിക്കെ വനിത കമ്മീഷന് ഇടപെടുകയും പിന്നീട് അന്വേഷണചുമതല നെടുമങ്ങാട് ഡിവൈ.എസ്.പിക്ക് കൈമാറുകയും ചെയ്തു.