മലയാലപ്പുഴ : മലയാലപ്പുഴ – മണ്ണാറക്കുളഞ്ഞി റോഡിന്റെ അശാസ്ത്രീയമായ നിര്മ്മാണത്തെ തുടര്ന്ന് ഒന്നര മാസത്തിനുള്ളില് മൂന്നാമതും വാഹനം അപകടത്തില്പ്പെട്ടു. റോഡിന്റെ ഇരുവശങ്ങളിലെയും കോണ്ക്രീറ്റ് പൂര്ത്തിയാക്കാത്തതും റോഡിന്റെ ഇരുവശങ്ങളിലും വാഹനയാത്രയ്ക്ക് തടസമായി നില്ക്കുന്ന പോസ്റ്റുകള് എടുത്ത് മാറ്റാത്തതുമാണ് അപകടങ്ങള്ക്ക് കാരണമാകുന്നത്. കെ.എസ്.ഇ.ബിക്ക് നോട്ടീസ് നല്കിയിട്ടും റോഡിലുണ്ടായിരുന്ന പോസ്റ്റുകള് എടുത്ത് മാറ്റിയില്ല. അതിനാല് ഇത് നിലനിര്ത്തിയാണ് ടാറിംഗ് പൂര്ത്തിയാക്കിയത്. റോഡ് നിര്മ്മാണത്തിന്റെ മറവില് കോണ്ട്രാക്ടറും പൊതുമരാമത്ത് ഉദ്യോഗസ്ഥരുമായി ചേര്ന്ന് ലോഡ് കണക്കിന് പച്ചമണ്ണ് സ്ഥലത്ത് നിന്നും എടുത്ത് മാറ്റിയതായും ആക്ഷേപമുണ്ട്.
റോഡിന്റെ വശങ്ങളില് കോണ്ക്രീറ്റ് പൂര്ത്തിയാകാത്ത ഭാഗത്ത് വാഹനങ്ങളുടെ ടയറുകള് താഴ്ന്നാണ് കൂടുതലും അപകടങ്ങള് നടന്നിട്ടുള്ളത്. മാത്രമല്ല ടാറിംഗ് നടന്നതിന് ശേഷം കൈകള് കൊണ്ട് ടാര് ഇളക്കി എടുക്കാവുന്ന രീതിയില് ഗുണനിലവാരമില്ലാതെയാണ് ടാറിംഗ് പൂര്ത്തീകരിച്ചത് എന്നും നാട്ടുകാര് ആക്ഷേപിക്കുന്നു. സംഭവത്തില് പ്രതിഷേധിച്ച് പൊതുമരാമത്ത് മന്ത്രിക്കും പത്തനംതിട്ട ജില്ലാ കളക്ടര്ക്കും പരാതി നല്കാന് ഒരുങ്ങുകയാണ് സ്ഥലത്തെ ഗ്രാമപഞ്ചായത്ത് അംഗം വിഷ്ണു മലയാലപ്പുഴ.
