അലിഗര്‍ : തുടര്‍ച്ചയായുണ്ടായ വ്യാജമദ്യദുരന്തത്തിന്റെ പശ്ചാത്തലത്തില്‍ ഉത്തര്‍പ്രദേശ് പോലീസ് സേനയില്‍ കൂട്ട സ്ഥലമാറ്റം. കഴിഞ്ഞ രണ്ടുവര്‍ഷമായി ഒരേ പോലീസ് സ്റ്റേഷനില്‍ ജോലിയില്‍ തുടരുന്ന 540 പേരെയാണ് സ്ഥലം മാറ്റിയത്. ഇവരില്‍ 148 പേര്‍ക്ക് ജില്ലയ്ക്ക് പുറത്തേക്കാണ് സ്ഥലം മാറ്റം.
അതെ സമയം മദ്യ മാഫിയയുമായി ബന്ധമുണ്ടെന്ന് സംശയിക്കുന്ന അഞ്ച് സ്റ്റേഷന്‍ ഹൗസ് ഓഫീസര്‍മാരെയും ഒരു സര്‍ക്കിള്‍ ഇന്‍സ്പെക്ടറെയും സസ്പെന്‍ഡ് ചെയ്തതായി അധികൃതര്‍ അറിയിച്ചു. ഇതിന് പിന്നാലെ വ്യാജമദ്യം വിതരണം ചെയ്ത സംഭവത്തില്‍ പ്രധാന പ്രതിയായ മദ്യമാഫിയ നേതാവ് റിഷി ശര്‍മയെ കണ്ടെത്താനുള്ള അന്വേഷണം പോലീസ് ശക്തമാക്കി.
ജൂണ്‍ രണ്ടിന് നടന്ന റോഹര ഗ്രാമത്തിലുണ്ടായ മദ്യദുരന്തത്തില്‍ 52 പേര്‍ മരിച്ചതായാണ് അനൗദ്യോഗിക റിപ്പോര്‍ട്ട്. അതില്‍ 35 പേരുടെ മരണം വ്യാജമദ്യം കഴിച്ചത് മൂലമാണെന്ന് സ്ഥിരീകരിച്ചിട്ടുണ്ട്. കഴിഞ്ഞ ദിവസം കനാലില്‍ നിന്ന് മൂന്ന് പേരെയും കൊഡിയഗുഞ്ച് ഗ്രാമത്തില്‍ നിന്ന് മറ്റൊരാളെയും വ്യാജമദ്യം കഴിച്ച്‌ മരിച്ച നിലയില്‍ കണ്ടെത്തിയിരുന്നു. മരിച്ചവരില്‍ ഭൂരിപക്ഷവും ബീഹാറില്‍ നിന്ന് കുടിയേറിയ ഇഷ്ടിക ചൂള തൊഴിലാളികളാണ്.
