അക്കൗണ്ടിൽ പണം ഇല്ലെങ്കിലും യു പി ഐ പേമെന്റ് നടത്താൻ സാധിക്കുന്ന സംവിധാനം വരുന്നു. റിസർവ് ബാങ്ക് അടുത്തിടെ ക്രെഡിറ്റ് ലൈൻ സൗകര്യങ്ങൾ ഒരുക്കുന്നതുമായി ബന്ധപ്പെട്ട് ബാങ്കുകൾക്ക് അനുമതി നൽകിയതിനെ തുടർന്നാണ് പുതിയ സൗകര്യം ഒരുങ്ങുന്നത്. ഉപയോക്താക്കൾക്ക് അനുവദിക്കപ്പെട്ട പരിധിയിൽ വിനിമയങ്ങൾ നടത്താനും പിന്നീട് ഈ തുക തിരികെ അടയ്ക്കാനും കഴിയുന്ന രീതിയാണ് ഇത്. നിലവിൽ ഉപയോക്താക്കൾക്ക് സേവിംഗ്സ് അക്കൗണ്ടുകൾ, ഓവർഡ്രാഫ്റ്റ് അക്കൗണ്ടുകൾ, പ്രീ പെയ്ഡ് വാലറ്റുകൾ, ക്രെഡിറ്റ് കാർഡുകൾ തുടങ്ങിയവ മാത്രം ആണ് യു പി ഐ സംവിധാനവുമായി ബന്ധിപ്പിക്കാൻ സാധിക്കുക.
എന്നാൽ പുതിയ സംവിധാനത്തിലൂടെ മുൻ കൂട്ടി അനുവദിക്കപ്പെട്ട ക്രെഡിറ്റ് പരിധിക്കുള്ളിൽ ഉള്ള യു പി ഐ വിനിമയങ്ങളും സാധ്യമാകും. വാണിജ്യ ബാങ്കുകൾക്ക് ഈ സൗകര്യം വ്യക്തികൾക്ക് നൽകാം. ഉപയോക്താക്കളുടെ മുൻ കൂട്ടിയുള്ള സമ്മതം ഇതിന് ആവശ്യമാണ്. ഗൂഗിൾ പേ, പേടിഎം തുടങ്ങിയ യു പി ഐ ആപ്ലിക്കേഷനുകളിലൂടെ ഈ സൗകര്യം ഉപയോഗപ്പെടുത്താം. വിവിധ ബാങ്കപുകളുടെ പോളിസികൾ ബാധകം ആയിരിക്കും. പ്രീ അപ്രൂവ്ഡ് പരിധിയിൽ ഒരു ക്രെഡിറ്റ് ലൈൻ രൂപീകരിക്കാൻ ഉപയോക്താവിന്റെ അനുവാദം ബാങ്ക് ആവശ്യപ്പെടും ഈ പ്രക്രിയ പൂർത്തിയായാൽ അനുവദിക്കപ്പെട്ട പരിധിയിൽ യു പി ഐ അപ്ലിക്കേഷനുകൾ വഴി വിനിമയങ്ങൾ നടത്താം. കാലാവധി ദിവസത്തിന് മുമ്പ് കുടിശ്ശിക തീർക്കണം. ക്രെഡിറ്റ് ലൈൻ സൗകര്യം നൽകുമ്പോൾ ഉപയോഗിക്കുന്ന തുകയ്ക്ക് ചില ബാങ്കുകൾ പലിശ ഈടാക്കാറുണ്ട്. ബാങ്കുകൾക്കനുസരിച്ച് പലിശ നിരക്ക് വ്യത്യസ്തപ്പെടാം.
