ഡല്ഹി: കല്ക്കരി ഇടപാടുമായി ബന്ധപ്പെട്ട് അദാനി ഗ്രൂപ്പിനെതിരായ കേസില് അടിയന്തരമായി വാദംകേട്ട് ഉത്തരവിറക്കണമെന്ന് ചീഫ് ജസ്റ്റിസ് ഡി.വൈ. ചന്ദ്രചൂഡിന് കത്ത്. 21 രാജ്യാന്തര സംഘടനകളാണ് കത്ത് നല്കിയത്. ഡയറക്ടറേറ്റ് ഓഫ് റവന്യു ഇന്റിലിജന്സ് ഫയല് ചെയ്ത കേസില് ഉടന് വാദം കേട്ട് ഉത്തരവിറക്കണം എന്നാണ് കത്തിലെ ആവശ്യം. അദാനി ഗ്രൂപ്പ് കല്ക്കരി കുംഭകോണം നടത്തി വന് ലാഭം നേടിയെന്ന ഫിനാന്ഷ്യല് ടൈംസ് റിപ്പോര്ട്ടിന് പിന്നാലെയാണ് കത്ത്. ഗുണനിലവാരമില്ലാത്ത കല്ക്കരി ഇന്ഡൊനീഷ്യയില്നിന്ന് ഇറക്കുമതി ചെയ്ത് ഉയര്ന്ന വിലയ്ക്ക് തമിഴ്നാടിന്റെ പൊതുമേഖലാ സ്ഥാപനമായ ടാംഗെട്കോക്ക് അദാനി ഗ്രൂപ്പ് വിറ്റു എന്നായിരുന്നു റിപ്പോര്ട്ട്.
2011-നും 2015-നും ഇടയില് ഇന്ഡൊനീഷ്യയില് നിന്ന് കല്ക്കരി ഇറക്കുമതി ചെയ്തതില് തുക പെരുപ്പിച്ച് കാണിച്ചതുമായി ബന്ധപ്പെട്ട് അദാനി ഗ്രൂപ്പിലെ ചില കമ്പനികള്ക്കെതിരെ ഡയറക്ടറേറ്റ് ഓഫ് റവന്യു ഇന്റിലിജന്സ് അന്വേഷണം നടത്തിയിരുന്നു. 2016-ലെ ഈ കേസ് നിലവില് സുപ്രീം കോടതിയുടെ പരിഗണനയിലാണ്.
