പട്ടാമ്പി : ആടുകൾക്ക് മഴക്കാലത്തുണ്ടാവുന്ന ശ്വാസകോശ അണുബാധയ്ക്കെതിരെ ശ്രദ്ധവേണമെന്ന് പട്ടാമ്പിയിലെ ജില്ലാ കൃഷിവിജ്ഞാനകേന്ദ്രം അധികൃതരുടെ മുന്നറിയിപ്പ്. വായിൽ നിന്നും മൂക്കിൽ നിന്നും വരുന്ന വെള്ളയും മഞ്ഞയും നിറത്തിലുള്ള കട്ടികൂടിയ ദ്രാവകമാണ് ഇതിന്റെ ലക്ഷണം. ഇത്തരം ലക്ഷണങ്ങൾ കണ്ടാൽ കൃത്യമായ ചികിത്സ നൽകാൻ ശ്രദ്ധിക്കണമെന്നും അധികൃതർ പറയുന്നു.
ആടുകൾ കൂട്ടിൽ തിങ്ങിപ്പാർക്കുന്ന സാഹചര്യത്തിലാണ് അണുബാധ കണ്ടുവരുന്നത്. കൂട് നിർമിക്കുമ്പോൾ ഒരു ആടിന് ഒരു ചതുരശ്രമീറ്റർ വിസ്തീർണമാണ് കണക്കാക്കുന്നത്. ഇത് പാലിക്കാതെവരുന്ന അവസരങ്ങളിൽ ആടുകൾ തിങ്ങിപ്പാർക്കാൻ ഇടയാകുന്നു. ഇത്തരം സാഹചര്യങ്ങളിലാണ് മഴക്കാലത്ത് ശ്വാസകോശ സംബന്ധമായ അണുബാധയ്ക്ക് കാരണമാകുന്നതെന്നും കൃഷിയധികൃതർ പറയുന്നു.