കൊല്ലം: പ്ലാസ്റ്റിക് കുപ്പിയില്നിന്ന് പുറത്തിറക്കിയ മൂര്ഖന്റെ തലയില് വടികൊണ്ട് കുത്തിപ്പിടിച്ച് ഉത്രയുടെ കൈയില് രണ്ടുപ്രാവശ്യം കടിപ്പിച്ചെന്നും കഴിഞ്ഞ പ്രാവശ്യത്തെപോലെ രക്ഷപ്പെടാതിരിക്കാനാണ് ഇങ്ങനെ ചെയ്തതെന്നും സൂരജ് വെളിപ്പെടുത്തിയതായി വനം കുറ്റകൃത്യങ്ങള് അന്വേഷിക്കുന്ന ഫോറസ്റ്റ് റേഞ്ച് ഓഫിസറായ ബി.ആര്. ജയന് മൊഴി നല്കി. ഉത്രവധക്കേസില് കൊല്ലം ആറാം അഡീഷനല് സെഷന്സ് കോടതി ജഡ്ജി എം. മനോജ് മുമ്പാകെ വിസ്താരത്തിനിടെയാണ് മൊഴി. അണലി കടിച്ച് കരഞ്ഞ ഉത്രയെ ഒന്നുമില്ലെന്ന് പറഞ്ഞ് വീണ്ടും കിടത്തി.
അനക്കമില്ലെന്ന് കണ്ടപ്പോള് ആള്ക്കാരെ വിശ്വസിപ്പിക്കാനാണ് ആശുപത്രിയില് കൊണ്ടുപോയത്. അന്ന് അണലി എവിടെയെന്ന് ആളുകള് ചോദിച്ചതിനാല് മൂര്ഖനെകൊണ്ട് കടിപ്പിച്ച ദിവസം മുറിയില്തന്നെ ഇട്ടിരുന്നെന്നും ഒളിപ്പിച്ചുവെച്ച പ്ലാസ്റ്റിക് കുപ്പി പിന്നീട് മാറ്റാന് കഴിഞ്ഞില്ലെന്നും സൂരജ് പറഞ്ഞതായും മൊഴിയുണ്ട്. ഉത്രയുടെ മരണത്തില് തനിക്ക് മാത്രമേ പങ്കുള്ളൂവെന്നും വീട്ടുകാര്ക്ക് ഒരു പങ്കുമില്ലെന്നും സൂരജ് പറഞ്ഞതായും ഫോറസ്റ്റ് റേഞ്ച് ഓഫിസര് മൊഴി നല്കി.
കേന്ദ്ര വന്യജീവി സംരക്ഷണ നിയമപ്രകാരം പാമ്പുകളെ കൈവശം വെച്ചതിനും വില്പന നടത്തിയതിനും സൂരജ്, ചാവര്കാവ് സുരേഷ്, ഉത്രയുടെ സഹോദരന് വിഷു എന്നിവരുടെ പേരില് കേസെടുത്തെന്നും സൂരജിന്റെയും സുരേഷിന്റെയും മൊഴി അന്വേഷണാവശ്യത്തിന് കസ്റ്റഡിയില് വാങ്ങി രേഖപ്പെടുത്തിയെന്നും ബി.ആര്. ജയന് മൊഴിനല്കി.
ഉത്രയുടെ ആന്തരാവയവങ്ങളും രക്തവും കടിയേറ്റിടത്തെ തൊലിയും രാസപരിശോധന നടത്തിയെന്നും രക്തത്തിലും കടിയേറ്റിടത്തെ തൊലിയിലും മൂര്ഖന്റെ വിഷവും ആന്തരികാവയവങ്ങളിലും രക്തത്തിലും സിട്രസിന് എന്ന മരുന്നും കണ്ടെത്തിയതായി തിരുവനന്തപുരം കെമിക്കല് അനാലിസിസ് ലബോറട്ടറിയിലെ കെമിക്കല് എക്സാമിനര് യുറേക്ക മൊഴി നല്കി. ഉത്രയുടെ വീട്ടില്നിന്ന് കുഴിച്ചെടുത്ത പാമ്പ്, പ്ലാസ്റ്റിക് കുപ്പി, ഷോള്ഡര് ബാഗ്, ഉത്രയുടെ നൈറ്റി, കിടന്നിരുന്ന ബെഡ് ഷീറ്റ് എന്നിവയുടെ ഡി.എന്.എ പരിശോധന നടത്തിയതായി രാജീവ് ഗാന്ധി ഇന്സ്റ്റിറ്റ്യൂട്ട് ഓഫ് ബയോടെക്നോളജി ഡി.എന്.എ വിഭാഗത്തിലെ സയന്റിഫിക് ഓഫിസര് സുരേഷ്കുമാര് മൊഴി നല്കി.
പാമ്പിന്റെ സാമ്പിളും പ്ലാസ്റ്റിക് കുപ്പിയില്നിന്ന് തുടച്ചെടുത്ത, നഗ്നനേത്രത്തിന് കാണാന് കഴിയാത്തതായ കോശങ്ങളും പരിശോധിച്ചതില്നിന്ന് അത് മൂര്ഖന്റെ ഡി.എന്.എ ആണെന്ന് കണ്ടെത്തി. ഷോള്ഡര് ബാഗില് ഡി.എന്.എ ഒന്നും ലഭിച്ചില്ലെന്നും മൊഴി നല്കി. ചൊവ്വാഴ്ച അന്വേഷണ ഉദ്യോഗസ്ഥരുടെ സാക്ഷി വിസ്താരം തുടങ്ങും.