പന്തളം : പരസ്യമായി അസഭ്യം പറഞ്ഞ നഗരസഭ ചെയര്‍പേഴ്സനെ മാറ്റാത്തതില്‍ പ്രതിഷേധിച്ച്‌ ബി.ജെപി പാര്ലമെന്ററി പാര്‍ട്ടി സ്ഥാനം കെ.വി.പ്രഭ രാജിവെച്ചതോടെ പന്തളം ബി.ജെ.പിയില്‍ ഭിന്നത മറനീക്കി പുറത്തുവന്നു. എന്നാല്‍ നഗരസഭ ഭരണം നഷ്ടപ്പെട്ടാലും സംഘടന പ്രവര്‍ത്തനം ശക്തിപ്പെടുത്തണമെന്നാണ് ആര്‍.എസ്.എസ് നേതൃത്വത്തിന്‍റെ നിര്‍ദേശമെന്നാണ് അറിയുന്നത്. നഗരസഭയില്‍ വിവാദ വീഡിയോക്ക് പിന്നാലെ ബി.ജെ.പി, ആര്‍.എസ്.എസ് രണ്ട് ചേരിയില്‍ നിന്നാണ് നഗരസഭ ഭരണത്തെ കണ്ടിരുന്നത്.
ചെയര്‍പേഴ്സന്‍ തല്‍സ്ഥിതി തുടരാനാണ് ആര്‍.എസ്.എസ് നിര്‍ദേശിച്ചിരിക്കുന്നത്. ബി.ജെ.പി ഭരണസമിതിയിലെ പടലപ്പിണക്കവും ഗ്രൂപ്പുകളിയും അതിരുവിട്ടതിന്‍റെ തുടര്‍ച്ചയാണ് പാര്ലമെന്ററി പാര്‍ട്ടി ലീഡര്‍ സ്ഥാനം രാജിവെക്കാന്‍ ഇടയാക്കിയത്. രാജിവെച്ചതോടെ കെ.വി. പ്രഭ പാര്‍ട്ടിയില്‍ ഒറ്റപ്പെടുകയാണ്.
രണ്ടുമാസം മുമ്പ് കെ.വി. പ്രഭക്കുനേരെ പന്തളം നഗരസഭ ചെയര്‍പേഴ്സന്‍ സുശീല സന്തോഷ് അസഭ്യവര്‍ഷം നടത്തിയത് നവമാധ്യമങ്ങളിലൂടെ പുറത്തായിട്ടും അധ്യക്ഷക്കെതിരെ നടപടി സ്വീകരിക്കാത്തതില്‍ പ്രതിഷേധിച്ചാണ് രാജി. ബി.ജെ.പി ജില്ല നേതൃത്വം ചര്‍ച്ചക്ക് വിളിച്ചപ്പോള്‍ കെ.വി. പ്രഭയും ഗ്രൂപ്പിലുള്ള കൗണ്‍സിലര്‍മാരും പങ്കെടുത്തെങ്കിലും ചെയര്‍പേഴ്സനും മറു ഗ്രൂപ്പിലുള്ളവരും പങ്കെടുത്തില്ല.
