കൊല്ലം: ഹിന്ദു ദൈവങ്ങളെ അധിക്ഷേപിച്ചെന്ന പരാതിയില്‍ കെ.പി.സി.സി ഉപാധ്യക്ഷന്‍ വി.ടി ബല്‍റാമിനെതിരെ പോലീസ് കേസ്. കൊല്ലം അഞ്ചാലംമൂട് പോലീസാണ് കേസ് രജിസ്റ്റര്‍ ചെയ്‍തത്. ദൈവങ്ങളെ അധിക്ഷേപിച്ച്‌ ഫേസ്ബുക്കില് പോസ്റ്റിട്ടെന്ന് ആരോപിച്ച്‌ കൊല്ലം സ്വദേശി ജി.കെ മധു നല്‍കിയ പരാതിയിലാണ് സൈബര്‍ കുറ്റം ചുമത്തി എഫ്.ഐ.ആര്‍ ഇട്ടത്. പുതിയ പാര്‍ലമെന്‍റ് കെട്ടിടത്തിലെ അശോക സ്തംഭ സിംഹങ്ങള്‍ക്ക് ഭാവ വ്യത്യാസമുണ്ടെന്ന വിമര്‍ശനങ്ങളോടുള്ള പരോക്ഷ വിമര്‍ശനമാണ് വി.ടി ബല്‍റാം ഫേസ്ബുക്ക് പോസ്റ്റിലൂടെ പങ്കുവെച്ചിരുന്നത്. ‘എന്തിനാണ് ഈ ദൈവങ്ങളൊക്കെ ഇങ്ങനെ കലിപ്പന്മാരാവുന്നത്? ഒരു പൊടിക്ക് ഒന്നടങ്ങിക്കൂടെ’ എന്നാണ് അദ്ദേഹം ഫേസ്ബുക്കില് കുറിച്ചത്. ഹനുമാന്‍റെയും ശിവന്‍റെയും ചിത്രങ്ങള്‍ പങ്കുവെച്ചുകൊണ്ടായിരുന്നു വി.ടി ബല്‍റാമിന്‍റെ ചോദ്യം.
