വടശ്ശേരിക്കര : വടശ്ശേരിക്കരയില്‍ 100 രൂപക്ക് ചിക്കന്‍ വില്‍പ്പന, അതും ആംബുലന്‍സിന്റെ മുന്‍ ഗ്ലാസ്സില്‍ പരസ്യം പ്രദര്‍ശിപ്പിച്ച്. ചോദ്യം ചെയ്തവര്‍ക്ക് തല്ലും കിട്ടി. വടശേരിക്കര സ്റ്റാന്‍ഡില്‍ പാര്‍ക്ക് ചെയ്ത ആംബുലന്‍സിലാണ് എം.ഡി.എന്‍ എന്ന മത്സ്യവില്പന കേന്ദ്രത്തിലെ തൊഴിലാളികളുടെ പരാക്രമം അരങ്ങേറിയത്.
ഫോറസ്റ്റ് ഉദ്യോഗസ്ഥരുടെ കസ്റ്റഡിയില്‍ ഇരിക്കെ കൊല്ലപ്പെട്ട പൊന്നുവിന്റെയാണ് ഈ ആംബുലന്‍സ് സര്‍വീസ്.
കോവിഡ് കാലത്ത് തലങ്ങും വിലങ്ങും പണം വാങ്ങിയും സേവനമായും രാപകലില്ലാതെ ഓടിയ ആംബുലന്‍സാണിത്.
മീനും കോഴിയും വില്പന നടത്തുന്ന കടയുടെ മുന്നില്‍ പാര്‍ക്ക് ചെയ്തതിനാണ് കോഴിയുടേയും മീനിന്റെയും വില എഴുതിയ പോസ്റ്ററുകള്‍ പതിച്ചത്.
ഇത് ചോദ്യം ചെയ്ത ഡ്രൈവറേയും മരിച്ച പൊന്നുവിന്റെ സൃഹൃത്തുക്കളേയുമാണ് മത്സ്യവില്പനക്കാര്‍ മര്‍ദ്ദിച്ചത്.
പരിക്കേറ്റ ഇവര്‍ റാന്നി താലുക്ക് ആശുപത്രിയില്‍ ചികിത്സ തേടി. സംഭവമറിഞ്ഞ് പെരുനാട് പോലീസ് സ്ഥലത്തെത്തിയിട്ടും തെരുവ് ഗുണ്ടകളെ പോലെ കൂസലില്ലാതെ ഇവര്‍ നിന്നു എന്ന് കാഴ്ച്ചക്കാരും പറയുന്നു.
സ്റ്റേഷനിലെ ഏതോ ഒരു പോലീസുകാരന്‍ ഇവരുടെ ബന്ധുവാണന്നും ഇതിന്റെ ബലത്തിലാണ് ഗുണ്ടായിസം കാട്ടുന്നതെന്നും പരിക്കേറ്റവര്‍ പറയുന്നു.
സമീപകാലത്ത് തുടങ്ങിയ മത്സ്യ വില്‍പ്പന കടയാണിത്. എന്നാല്‍ ആംബുലന്‍സ് പാര്‍ക്ക് ചെയ്ത സ്ഥലമാകട്ടെ വര്‍ഷങ്ങളായി ടാക്സി സ്റ്റാന്‍ഡുമാണ്. മാത്രമല്ല മത്സ്യ കടക്ക് ബുദ്ധിമുട്ടുണ്ടാകാത്ത വിധമാണ് ഡ്രൈവര്‍ ആംബുലന്‍സ് പാര്‍ക്ക് ചെയ്തിരുന്നത്. പൊന്നുവിന്റെ മരണശേഷം അദ്ദേഹത്തിന്റെ സ്മരണാര്‍ത്ഥമാണ് ഈ ആംബുലന്‍സ് സര്‍വീസ് ബന്ധുക്കള്‍ തുടരുന്നത്. നിരാലംബരായ നിരവധി പേര്‍ക്ക് വിളിപ്പുറത്ത് സേവനവുമായി ഓടി എത്തുന്ന വാഹനത്തോടാണ് അതിക്രമം നടത്തിയത്.
