കോട്ടയം: സംസ്ഥാന സര്ക്കാരിന്റെ നേതൃത്വത്തില് സംഘടിപ്പിക്കുന്ന 603 ദിവസം നീളുന്ന വൈക്കം സത്യഗ്രഹ ശതാബ്ദി ആഘോഷങ്ങളുടെ സംസ്ഥാനതല ഉദ്ഘാടനം ഇന്ന് വൈകീട്ട് 3.30ന് വൈക്കം ബീച്ചില് മുഖ്യമന്ത്രി പിണറായി വിജയനും തമിഴ്നാട് മുഖ്യമന്ത്രി എം.കെ. സ്റ്റാലിനും ചേര്ന്നു നിര്വഹിക്കും.വൈകീട്ട് 3.30ന് വൈക്കം തന്തൈ പെരിയാര് സ്മാരകത്തില് ഇരുമുഖ്യമന്ത്രിമാരും നടത്തുന്ന പുഷ്പാര്ച്ചനക്കു ശേഷമാണ് ഉദ്ഘാടന ചടങ്ങ്. മന്ത്രി വി.എന്. വാസവന് അദ്ധ്യക്ഷത വഹിക്കും. വിവര-പൊതുജന സമ്പര്ക്ക വകുപ്പ് പുറത്തിറക്കുന്ന ‘വൈക്കം പോരാട്ടം’ എന്ന പുസ്തകത്തിന്റെ മലയാളം പതിപ്പ് പ്രകാശനം എം.കെ. സ്റ്റാലിന് നല്കി പിണറായി നിര്വഹിക്കും.
ശതാബ്ദി ലോഗോ പ്രകാശനം സി.കെ. ആശ എം.എല്.എക്ക് നല്കി എം.കെ. സ്റ്റാലിന് നിര്വഹിക്കും.വൈക്കം സത്യഗ്രഹം കൈപ്പുസ്തക പ്രകാശനം തോമസ് ചാഴികാടന് എംപിക്ക് നല്കി മുഖ്യമന്ത്രി പിണറായി വിജയന് നിര്വഹിക്കും. മന്ത്രിമാരായ സജി ചെറിയാന്, മന്ത്രിമാരായ കെ. രാജന്, റോഷി അഗസ്റ്റിന്, കെ. രാധാകൃഷ്ണന്, എ.കെ. ശശീന്ദ്രന്, കെ. കൃഷ്ണന് കുട്ടി, ആന്റണി രാജു, അഹമ്മദ് ദേവര്കോവില് സര്ക്കാര് ചീഫ് വിപ്പ് ഡോ. എന്. ജയരാജ്, പ്രതിപക്ഷ നേതാവ് വി.ഡി. സതീശന്, ലോക്സഭാ അംഗം ടി.ആര്. ബാലു, രാജ്യസഭ അംഗങ്ങളായ ജോസ് കെ. മാണി, ബിനോയ് വിശ്വം തുടങ്ങിയവര് വിശിഷ്ടാതിഥികളാകും. 15,000 പേര്ക്ക് ഇരിക്കാവുന്ന വലിയ പന്തലാണ് സ്ഥാപിച്ചിട്ടുള്ളത്.