തിരുവനന്തപുരം; വൈക്കം സത്യാഗ്രഹത്തിന്റെ ശതാബ്ദി ആഘോഷങ്ങള്‍ക്ക് തമിഴ്നാട് മുഖ്യമന്ത്രി എംകെ സ്റ്റാലിനെ ക്ഷണിച്ച് സര്‍ക്കാര്‍. മുഖ്യമന്ത്രി പിണറായി വിജയന്റെ ക്ഷണപത്രം എംകെ സ്റ്റാലിന് കേരളത്തിന്റെ സാംസ്‌കാരികവകുപ്പ് മന്ത്രി സജി ചെറിയാന്‍ കൈമാറി. നാഗര്‍കോവിലില്‍ നടന്ന മേല്‍മുണ്ട് സമ്മേളനത്തിന്റെ വാര്‍ഷികത്തില്‍ വൈക്ക സത്യാഗ്രഹത്തിന്റെ വാര്‍ഷികം ഒരുമിച്ച് ആഘോഷിക്കണമെന്ന ആവശ്യം മുന്‍പോട്ടുവെച്ചിരുന്നു. ഇതോടനുബന്ധിച്ചാണ് വാര്‍ഷികം കേരളവും തമിഴ്നാടും ഒരുമിച്ച് ആഘോഷിക്കണമെന്ന ആവശ്യം സ്റ്റാലിന് മുന്‍പോട്ടുവെച്ചത്.
അതേസമയം വൈക്കം സത്യാഗ്രഹത്തിന്റെ ശതാബ്ദി ആഘോഷപരിപാടികളില്‍ നിന്നും വിട്ടുനില്‍ക്കാന്‍ എന്‍ എസ് എസ് തിരുമാനിച്ചതായി ജനറല്‍ സെക്രട്ടറി ജി സുകുമാരന്‍ നായര്‍ നേരത്തെ അറിയിച്ചിരുന്നു. ശതാബ്ദിയാഘോഷങ്ങളുടെ ഉദ്ഘാടനം വൈക്കത്ത് ഏപ്രില്‍ ഒന്നിന് വൈകിട്ട് 4.30ന് മുഖ്യമന്ത്രി പിണറായി വിജയനും തമിഴ്നാട് മുഖ്യമന്ത്രി എം കെ സ്റ്റാലിനും ചേര്‍ന്ന് നിര്‍വ്വഹിക്കും. വൈക്കം സത്യഗ്രഹം നടന്ന 603 ദിവസത്തെ അനുസ്മരിച്ചാണ് പരിപാടികള്‍.
