തിരുവനന്തപുരം: മുതിര്ന്ന കോണ്ഗ്രസ് നേതാവ് വക്കം പുരുഷോത്തമന് (96) അന്തരിച്ചു. തിരുവനന്തപുരം കുമാരപുരത്തെ വീട്ടിലായിരുന്നു അന്ത്യം. കുറച്ച് ദിവസങ്ങളായി ആരോഗ്യപ്രശ്നങ്ങളുണ്ടായിരുന്നു. ഇതിന്റെ ഭാഗമായി ചികിത്സതേടിയിരുന്നു. ഇന്ന് ഉച്ചക്ക് ശ്വാസതടസ്സമുണ്ടാവുകയും മരണം സംഭവിക്കുകയുമായിരുന്നു. അഭിഭാഷക ജോലിയില് നിന്നാണ് വക്കം പുരുഷോത്തമന് രാഷ്ട്രീയത്തിലേക്കെത്തിയത്. മൂന്നു തവണ സംസ്ഥാന മന്ത്രിയായിട്ടുണ്ട്. രണ്ട് തവണ ലോക്സഭാ അംഗം, രണ്ട് തവണ ഗവര്ണര്, അഞ്ച് തവണ നിയമസഭാ അംഗവുമായി. ഏറ്റവും അധികം കാലം നിയമ സഭാ സ്പീക്കര് ആയിരുന്ന നേതാവാണ്. ധനമന്ത്രി, സ്പീക്കര് എന്നി പദവികളില് മികച്ച പ്രവര്ത്തനം കാഴ്ച്ച വെച്ചിട്ടുണ്ട്.
മുഖ്യമന്ത്രിയാകാതെ ക്ലിഫ് ഹൗസില് താമസിച്ച ആദ്യത്തെയാളും വക്കമാണ്. സ്വിറ്റ്സര്ലന്ഡിലെ ദാവോസില് ഉമ്മന്ചാണ്ടി വീണുപരിക്കേറ്റ് ചികില്സയിലായിരുന്നപ്പോള് വക്കത്തിനായിരുന്നു മുഖ്യമന്ത്രിയുടെ ചുമതല. 1994ല് ആന്ഡമാന് നിക്കോബാര് ദ്വീപുകളുടെ ലഫ്റ്റ്നന്റ് ഗവര്ണര് സ്ഥാനം ഏറ്റെടുത്ത അദ്ദേഹം 2011ല് മിസോറം ഗവര്ണറായി.
