പന്തളം : തോട്ടക്കോണം ഗവ. ഹയർ സെക്കൻഡറി സ്കൂളിൽ വിവിധ പദ്ധതികളുടെ ഉത്ഘാടനം നടന്നു. പുതിയതായി സ്ഥാപിച്ച ടിങ്കറിംഗ് ലാബിന്റെ ഉത്ഘാടനം പന്തളം നഗരസഭ വിദ്യാഭ്യാസ സ്ഥിരം സമിതി അധ്യക്ഷ അഡ്വ.യാമി സേതുകുമാർ നിർവ്വഹിച്ചു. സ്കൂൾ പി.റ്റി.എ പ്രസിഡന്റ് കെ.എച്ച് ഷിജു അദ്ധ്യക്ഷത വഹിച്ചു. അടൂർ ഗവ.പോളിടെക്നിക് കോളേജ് അധ്യാപകൻ ഡോ.കെ.എസ്.സിശാന്ത് ടിങ്കറിംഗ് ലാബിന്റെ പ്രവർത്തനങ്ങളെയും പ്രയോജനങ്ങളെയും കുറിച്ച് വിദ്യാർത്ഥികൾക്കായി ക്ലാസ്സ് നയിച്ചു. വായന മാസാചരണവുമായി ബന്ധപ്പെട്ട് സ്കൂളിൽ നടത്തിയ വിവിധ മത്സരങ്ങളിൽ വിജയികളായ വിദ്യാർത്ഥികൾക്ക് അഡ്വ.യാമി സേതുകുമാർ സമ്മാനങ്ങൾ വിതരണം ചെയ്തു.
സ്കൂൾ തലത്തിൽ വിദ്യാർത്ഥികളിൽ സഹാനുഭൂതിയും സാമൂഹിക പ്രതിബദ്ധതയും വളർത്തുകയെന്ന ലക്ഷ്യത്തോടെ ആരംഭിച്ച സ്കൂൾ സോഷ്യൽ സർവ്വീസ് സ്കീം പ്രവർത്തനോദ്ഘാടനം പന്തളം നഗരസഭ ആരോഗ്യകാര്യ സ്ഥിരം സമിതി അധ്യക്ഷ സുനിത വേണു നിർവ്വഹിച്ചു. പന്തളം നഗരസഭ കൗൺസിലർമാരായ കെ.ആർ.വിജയകുമാർ, കെ.ആർ.ശ്രീലേഖ, സ്കൂൾ എസ്.എം.സി ചെയർമാൻ ജി.അനൂപ് കുമാർ, എസ്.എം.സി വൈസ് ചെയർപേഴ്സൺ സീതാലക്ഷ്മി, അധ്യാപികയായ സിമി, കെ.എ.അശോകൻ, ഓമനക്കുട്ടൻ, ജയലക്ഷ്മി എന്നിവർ സംസാരിച്ചു. സ്കൂൾ പ്രിൻസിപ്പാൾ എൻ.ഗിരിജ സ്വാഗതവും ഹെഡ്മാസ്റ്റർ പി.ഉദയൻ നന്ദിയും പറഞ്ഞു.
