തിരുവനന്തപുരം : വര്ക്കല ശ്രീ നാരായണ കോളേജില് ആര്.എസ്.എസ് ക്യാമ്പ് നടത്തിയതിനെതിരെ പ്രതിഷേധം ശക്തമാകുന്നു. ശ്രീനാരായണ ഗുരു ഉയര്ത്തിപ്പിടിച്ച മൂല്യങ്ങളോടുള്ള വെല്ലുവിളിയാണിതെന്ന് ആരോപിച്ച് ഡി വൈ എഫ് ഐ കോളേജിലേക്ക് മാര്ച്ച് നടത്തി. എയ്ഡഡ് സ്ഥാപനങ്ങളില് രാഷ്ട്രീയ പാര്ട്ടികളുടേയോ സംഘടനകളുടെയോ പരിപാടികള്ക്ക് വിലക്കുള്ളപ്പോള് നടത്തിയ ക്യാമ്പ് നിയമലംഘനമാണെന്ന് ഡി.വൈ.എഫ്.ഐ ആരോപിച്ചു.
ജാതി മത ചിന്തകള്ക്കതീതമായി ജനങ്ങളെ ഒന്നിപ്പിച്ചു നിര്ത്തുകയാണ് ശ്രീ നാരായണ ഗുരു ചെയ്തത്. അദ്ദേഹത്തിന്റെ പേരിലുള്ള കലാലയത്തില് ഇത്തരം പ്രവര്ത്തനങ്ങള് അംഗീകരിക്കാന് സാധിക്കില്ല. നിയമനടപടി സ്വീകരിക്കുന്നത് വരെ സന്ധിയില്ലാ സമരം തുടരുമെന്നും ഡി.വൈ.എഫ്.ഐ പ്രഖ്യാപിച്ചു. വര്ക്കല ബ്ലോക്ക് കമ്മിറ്റിയുടെ നേതൃത്വത്തില് നടത്തിയ മാര്ച്ച് വട്ടപ്ലാമൂട്ടില് നിന്നാണ് ആരംഭിച്ചത്.
ശേഷം കോളേജിന് മുന്നില് പ്രതിഷേധയോഗവും സംഘടിപ്പിച്ചു. ഇക്കഴിഞ്ഞ ശനി , ഞായര് ദിവസങ്ങളിലാണ് എസ്.എന് കോളജില് ആര്.എസ്.എസ് ആറ്റിങ്ങല് സംഘ ജില്ലയുടെ വര്ഷ പ്രതിപദ ഉത്സവം സംഘടിപ്പിച്ചത്. ആറ്റിങ്ങല് ഗവ. കോളേജില് നടത്താനിരുന്ന പരിപാടി കടുത്ത പ്രതിഷേധങ്ങള്ക്കൊടുവിലാണ് എസ്.എന് കോളജിലേക്ക് മാറ്റിയത്. ഒരു വര്ഷത്തെ സംഘടനാപ്രവര്ത്തനത്തെ കുറിച്ച് അവലോകനം ചെയ്യുന്നതിനായി നടത്തുന്ന പരിപാടിയാണ് വര്ഷപ്രതിപദ ഉത്സവം.
