വര്ക്കല : റെയില്വേ ക്രോസില് ഓട്ടോ യാത്രക്കാരെ റെയില്വേ ഗേറ്റില് പൂട്ടിയിട്ട സംഭവത്തില് ഗേറ്റ് കീപ്പര് സതീഷ് കുമാറിനെ സസ്പെന്ഡ് ചെയ്തു. മലയിന്കീഴ് സ്വദേശി സാജനും അമ്മയും യാത്ര ചെയ്ത ഓട്ടോ ആണ് റെയില്വേ ഗേറ്റിന് അകത്തിട്ട് പൂട്ടിയത്. ഇന്നലെ രാവിലെ നാലു മണിക്കാണ് സംഭവം. പാളത്തിനു നടുവിലാക്കി ഗേറ്റ് പൂട്ടിയതായി പരാതി.
ഗേറ്റ് കീപ്പറോട് ഉറങ്ങി പോയോ എന്നു ചോദിച്ചതിനാണ് ഓട്ടോ ഗേറ്റിനകത്തിട്ട് പൂട്ടിയതെന്ന് സാജന് പറഞ്ഞു. ഇതിനെതിരെ പരാതി ഉയര്ന്ന സാഹചര്യത്തിലാണ് നടപടി. യാത്രക്കാര് അസഭ്യം പറഞ്ഞതാണ് പ്രകോപനത്തിന് കാരണമായതെന്നും പെട്ടന്നു തന്നെ തുറന്നു കൊടുത്തിട്ടുണ്ടെന്നുമുള്ള വിശദീകരണമാണ് സതീഷ് നല്കിയിരിക്കുന്നത്. എന്നാല് ഇത് ഗുരുതരമായ പിഴവാണെന്ന് കണ്ടെത്തിയാണ് റെയില്വേ അധികൃതര് നടപടി സ്വീകരിച്ചിരിക്കുന്നത്.
