ന്യൂഡല്ഹി : തൊഴിലാളികളെ ബാധിക്കുന്ന മൂന്ന് ബില്ലുകള് ലോക്സഭയില് അവതരിപ്പിക്കപ്പെട്ടു. ഇതനുസരിച്ച് തൊഴിലുടമയ്ക്ക് ഇഷ്ടാനുസരണം തന്നെ തൊഴിലാളികളെ പിരിച്ചുവിടാനും പുതിയ തൊഴിലാളിയെ നിയമിക്കാനും കൂടുതല് സ്വാതന്ത്ര്യം ലഭിക്കും. എന്നാല് തൊഴിലാളികള്ക്ക് മികച്ച സേവന വേതന വ്യവസ്ഥകള് ഇതുവഴി ലഭ്യമാകുമെന്നാണ് കേന്ദ്രത്തിന്റെ അവകാശവാദം.
കേന്ദ്രസര്ക്കാര് തൊഴില് കോഡില് ഉള്പ്പെടുത്തിയിരിക്കുന്ന ഈ പുതിയ വ്യവസ്ഥകള് തൊഴിലാളികള്ക്ക് തിരിച്ചടിയാകും. ഇന്നലെയാണ് കേന്ദ്ര തൊഴില് മന്ത്രി സന്തോഷ്കുമാര് ഗാംഗ്വര് ലോക്സഭയില് പുതിയ ഇന്ഡസ്ട്രിയല് റിലേഷന് കോഡ് ബില്ല് അവതരിപ്പിച്ചത്. 300 അല്ലെങ്കില് അതില് കൂടുതല് ആളുകള് ജോലിചെയ്യുന്ന എല്ലാ സ്ഥാപനങ്ങള്ക്കും ഇന്ഡസ്ട്രിയല് റിലേഷന് കോഡ് ബാധകമാണ്.
തൊഴിലാളികളുടെ സാമൂഹ്യ സുരക്ഷാ കോഡ്, തൊഴില് സുരക്ഷ, ആരോഗ്യം, തൊഴില് സാഹചര്യം എന്നിവ സംബന്ധിച്ച ബില്ലുകളാണ് മറ്റ് രണ്ടെണ്ണം. 60 ദിവസത്തെ മുന്കൂര് നോട്ടീസ് നല്കാതെ തൊഴിലാളി സമരം ചെയ്യുന്നത് ഇതനുസരിച്ച് വിലക്കുന്നുണ്ട്. തൊഴില് തര്ക്ക പരിഹാരത്തിനുള്ള ട്രിബ്യൂണലുകളിലോ ദേശീയ വ്യവസായ ട്രിബ്യൂണലിലോ ഉള്ള തര്ക്കങ്ങള് തീര്പ്പാകാത്ത സമയത്തും നടപടികള് അവസാനിച്ചതിന് ശേഷം 60 ദിവസത്തിന് ശേഷവും തര്ക്കത്തിന്റെ പേരില് പണിമുടക്കിന് വിലക്കുണ്ടാകും.