കൊച്ചി: ഷിബു ബേബി ജോണിന്റെ വിമര്ശനങ്ങള്ക്ക് മറുപടിയുമായി പ്രതിപക്ഷ നേതാവ് വിഡി സതീശന്. വിമര്ശനങ്ങള് പറയേണ്ടത് യുഡിഎഫ് യോഗത്തിലാണെന്നും മാധ്യമങ്ങള്ക്ക് മുമ്പാകെയല്ലെന്നും സതീശന് പറഞ്ഞു. ഷിബു ബേബി ജോണ് യുഡിഎഫില് അഭിപ്രായം പറയണമെന്ന് സതീശന് പറഞ്ഞു. മാധ്യമങ്ങളോടല്ല കാര്യങ്ങള് പറയേണ്ടത്. എല്ലാ മാസവും യുഡിഎഫ് യോഗം ചേരുന്നുണ്ട്.
അതേസമയം യുഡിഎഫ് കൂടുതല് കാര്യക്ഷമമാകണമെന്നാണ് ഷിബു ബേബി ജോണ് പറഞ്ഞത്. ഇത്രയേറെ പ്രശ്നങ്ങള് ഉണ്ടായിട്ടും യുഡിഎഫ് യോഗം കൂടിയിട്ടില്ലെന്നും മുന്കാലങ്ങളിലെ രീതി ഇതായിരുന്നില്ലെന്നും ഷിബു ബേബി ജോണ് ആരോപിച്ചിരുന്നു. മറ്റന്നാള് യുഡിഎഫ് യോഗത്തില് ഇക്കാര്യങ്ങള് അറിയിക്കുമെന്നും ആര്എസ്പി നേതൃത്വം അറിയിച്ചു. യുഡിഎഫ് കുറേക്കൂടെ കാര്യക്ഷമമാകണമെന്നും സമരങ്ങള് ശക്തിപ്പെടണമെന്നും ഷിബു ബേബി പറഞ്ഞു. പുതിയ നികുതി വര്ധനവില് എന്ത് സമരം എന്ന് ഇതുവരെ തീരുമാനിച്ചിട്ടില്ല. ഇവന്മാര് എന്താണ് പുറത്തിറങ്ങി സമരം നടത്താത്തത് എന്നാണ് നാട്ടുകാര് ചോദിക്കുന്നതെന്നും ഷിബു ബേബി ജോണ് പറഞ്ഞു.
