തിരുവനന്തപുരം : സുരക്ഷ വെട്ടിക്കുറച്ചതുമായി ബന്ധപ്പെട്ട് പ്രതികരണവുമായി പ്രതിപക്ഷ നേതാവ് വിഡി സതീശന്. സുരക്ഷ കുറക്കുന്നതുമായി ബന്ധപ്പെട്ട് സര്ക്കാരില് നിന്നും ഒരു അറിയിപ്പും കിട്ടിയിട്ടില്ല. സര്ക്കാര് ആവശ്യപ്പെട്ടാല് ഔദ്യോഗിക വസതിയും വാഹനവും വിട്ടു നല്കാന് തയാറാണന്നും പ്രതിപക്ഷ നേതാവ് പറഞ്ഞു. പ്രതിപക്ഷ നേതാവ് എന്ന സ്ഥാനം ചെറുതാണെന്ന് തന്നെയും പൊതുസമൂഹത്തേയും ബോധ്യപ്പെടുത്താനാണ് സുരക്ഷ കുറച്ചതെങ്കില് വിരോധമില്ലെന്നും വിഡി സതീശന് പറഞ്ഞു.
പ്രതിപക്ഷ നേതാവിന്റെ സുരക്ഷ സെഡ് കാറ്റഗറിയില് നിന്ന് വൈ പ്ലസ് കാറ്റഗറിലേക്ക് മാറ്റിയ തീരുമാനത്തിലാണ് സതീശന്റെ പ്രതികരണം. ഇനിയുള്ളത് ഔദ്യോഗിക വസതിയും കാറുമാണ്. സര്ക്കാര് ആവശ്യപ്പെട്ടാല് ഔദ്യോഗിക വസതിയോ കാറോ എന്തു സൗകര്യം വേണമെങ്കിലും തിരിച്ചു നല്കാന് തയ്യാറാണ്. ഇവയൊന്നും കണ്ട് ഭ്രമിക്കുന്ന ആളല്ല താന്. ഇതൊന്നും തന്നെ ബാധിക്കുന്ന വിഷയങ്ങളല്ലെന്നും ഇക്കാര്യത്തില് വ്യക്തിപരമായി പരാതിയില്ലെന്നും വിഡി സതീശന് പറഞ്ഞു.
സുരക്ഷ കുറച്ചത് പത്രത്തിലൂടെയാണ് അറിഞ്ഞത്. വര്ഷങ്ങളായി പ്രതിപക്ഷ നേതാവിന് സംസ്ഥാനത്ത് ഒരു സ്ഥാനമുണ്ട്. അത് ഇടിച്ചു താഴ്ത്താനാണ് സര്ക്കാര് നോക്കുന്നതെങ്കില് തന്റെ സ്ഥാനത്തെയല്ല ബാധിക്കുക. പ്രതിപക്ഷ നേതൃസ്ഥാനത്തിന്റെ മഹത്വം കുറയ്ക്കാന് നടത്തുന്ന ശ്രമമാണോ ഇതെന്ന് അറിയില്ലെന്നും സതീശന് മാധ്യമങ്ങളോട് പ്രതികരിച്ചു.